Իրանի ՌՕՈւ–ն հրթիռային հարվածներ է հասցրել Իրաքի հյուսիսում գտնվող Թեհրանին ընդդիմադիր և Իրանում ահաբեկչական ճանաչված «Քրդստանի ազատություն» կուսակցության շտաբներին։ Այս մասին հայտնում է ՌԻԱ Նովոստին` վկայակոչելով Rudaw հեռուստաընկերությանը։

«Իրանական հրթիռակոծության են ենթարկվել «Քրդստանի ազատություն» կուսակցության շտաբները, որոնք գտնվում են Քիրքուք նահանգի Ալթինկեպրյու քաղաքում։ Մի քանի հրթիռ ընկել են շտաբների տարածքից դուրս, վիրավորներ չկան»,– հայտնել է հեռուստաալիքը։

Կուսակցության ղեկավար Հուսեին Յազդանը հայտարարել է, որ հարձակումն իրականացվել է նաև անօդաչու թռչող սարքերով։

Իսլամական հեղափոխության պահապանների կորպուսը շարունակել է Իրաքի հյուսիսում քրդական ուժերի դեմ գործողությունը` նրանց վրա ավիահարվածներ հասցնելով։ Անցած շաբաթ ԻՀՊԿ–ն հակաահաբեկչական գործողություն է իրականացրել Իրաքի հյուսիսում քրդերի ահաբերկչական բջիջների դեմ` կիրառելով անօդաչու թռչող սարքեր և հրթիռներ։ Գնդակոծության հետևանքով մեկ մարդ զոհվել է, 8-ը` վիրավորվել, այդ թվում են «Քուրդիստանի աշխատավորական կուսակցության» ջոկատների անդամները։

Հոկտեմբերին ԻՀՊԿ–ն 4 փուլով ռազմական գործողություն է սկսել Իրաքի հյուսիսում տեղակայված զինված քրդերի հակաիրանական խմբավորումների դեմ։ Գործողությանը մասնակցել են ցամաքային զորքերը, ինչպես նաև ԻՀՊԿ ռազմաօդային ուժերը։ Գործողության ընթացքում Իրանի ռազմաօդային ուժերը կետային հարվածներ են հասցրել օդային ավիացիայի, ինչպես նաև «կամիկաձե» անօդաչու թռչող սարքերի օգնությամբ: Գրոհների հետևանքով զոհվել է առնվազն 13 մարդ, վիրավորվել՝ 58–ը։ Նրանց մեծ մասը խաղաղ բնակիչներ են։