Արցախի Մարտունու շրջանի զինվորական հոսպիտալն օրերս փակվել է, եւ աշխատակիցներին որեւէ բացատրություն չի տրվել, թե ինչու է այդպես արվում: Այս մասին NEWS.am-ի հետ զրույցում նշել է Արցախի ԱԺ «Արդարություն» խմբակցության պատգամավոր Մետաքսե Հակոբյանը:

«Արդեն երկար ժամանակ է, որ սուսիկ-փուսիկ բավականին մեծ կրճատումներ սկսեցին նախ բանակի սպայական կազմի մեջ, հետո նաեւ ավելի ցածր կազմի մեջ, հիմա անցել են բուժհաստատություններին: Նույն վիճակում է նաեւ Ստեփանակերտի հոսպիտալը:

Ստեփանակերտի հոսպիտալում կրճատումներ են անում եւ արդեն զգացվում է, որ այդպիսի գործընթաց կա, քչացրել են հիվանդների քանակը: Ինչ-որ գործընթացներ են անում, որից ակնհայտ երեւում է, որ տանում են ապառազմականացման: Այդ առումով մենք արդեն որոշակի անելիքներ ունենք պլանավորած, չեմ ուզում առաջ ընկնել, սկսելու ժամանակ կասենք»,-ասել է նա:

Պատգամավորը հավելել է, որ Մարտունու շրջանի զինվորական հոսպիտալը կցել են մի այնպիսի տարածքի, որը տասնյակ կմ-ներով հեռու է.

«Կամ կանխամտածված է այսպիսի բան արվում, կամ տգետ են, որովհետեւ ինչպե՞ս են ռազմական գործողությունների ժամանակ կարողանալու զինվորին արագ բուժօգնություն ցուցաբերելու:  Մոռանում են, որ մենք անընդհատ պատերազմական իրավիճակում ենք, ամեն պահի այդ վտանգը մեր գլխին կախված է: Ես կարոող եմ ենթադրել, որ ուժեղ ճնշման արդյունքում է սա կատարվում, ինչպես Փաշինյանն է ասում՝ միջազգային հանրությունն է ճնշում»,-ընդգծել է ընդդիմադիր պատգամավորը:

Հիշեցնենք, որ կառավարության վերջին  նիստում ՀՀ վարչապետ Նիկոլ Փաշինյան ասաց, թե «Սոչիում Ռուսաստանի եւ Ադրբեջանի ղեկավարներին ներկայացրել է Ղարաբաղի իշխանությունների առաջարկը, որ եթե Արցախի շուրջ ստեղծվի ապառազմականացված գոտի՝ միջազգային երաշխիքներով, ապա նման մասշտաբի Պաշտպանության բանակ ունենալու կարիք Ղարաբաղը կարող է եւ չունենալ»։