Վահան Քերոբյա՞նը, թե՞ վարորդն է ենթարկվել վթարի․ Tert

ՀՀ Էկոնոմիկայի նախարար Վահան Քերոբյանը ընտանիքի անդամների հետ խնջույքից վերադառնալիս ենթարկվել է վթարի, այս մասին գրում է Tert.am-ը և նշում, որի իրենց աբյուրի փոխանցմամբ, տուգանվել է Վահան Քերոբյանի վարորդը։

Լրատվամիջոցը Էկոնոմիկայի նախարարություն հարցում էր ուղարկել այդ տեղեկությունների վերաբերյալ, հարցնելով, թե վթարի ենթարկվե՞լ է 190 LL 60 ավտոմեքենան,   ինչ գործողություն է կատարվել պարզելու համար, թե ո՞վ է եղել վթարի պահին ղեկին, վթարի հետևանքով քանի՞ անձ է վնասվածք ստացել, այդ թվում անչափահաս, աշխատանքային օրվա ընթացքո՞ւմ է եղել դեպքը, թե ոչ, ինչո՞ւ ծառայողական մեքենայով։

Էկոնոմիկայի նախարարությունը հարցմանը պատասխանել է մասամբ․ «190 LL 60» պետհամարանիշ ունեցող մեքենայով 2021 թվականին տեղի ունեցած ճանապարհատրանսպորտային պատահարի վերաբերյալ ՀՀ ոստիկանության պարեկային ծառայության կողմից կազմվել է արձանագրություն։ Նշանակվել է տուգանք, որը և վճարվել է վարորդի կողմից։ Լրացուցիչ տեղեկատվություն ստանալու համար կարող եք դիմել ՀՀ ոստիկանության պարեկային ծառայություն։

Միաժամանակ տեղեկացնում ենք, որ նախարար Վահան Քերոբյանը, աշխատանքային պարտականություններից ելնելով, շատ հաճախ, ոչ աշխատանքային օրերին ևս ունենում է հանդիպումներ, մասնակցում տարբեր միջոցառումների, ինչպես նաև ունենում է  մարզային այցելություններ»։

Լրատվամիջոցի՝ ՀՀ ոստիկանապետին ուղղված հարցումը մերժվել է։ Հարցերին, թե ո՞վ է եղել ղեկին, որքանո՞վ է տուգանվել, վթարի հետևանքով քանի՞ անձ է տուժել, ոստիկանությունը չի պատասխանել։