Շոյգուն և Հուլուսի Աքարը հեռախոսազրույց են ունեցել
Ռուսաստանի պաշտպանության նախարար Սերգեյ Շոյգուն հեռախոսազրույց է ունեցել Թուրքիայի պաշտպանության նախարար Հուլուսի Աքարի հետ։ Կողմերը քննարկել են հացահատիկի գործարքին մասնակցությունը դադարեցնելու Ռուսաստանի Դաշնության որոշումը։ Այս մասին հայտնում է Kp. ru-ն:
«Հոկտեմբերի 31-ին Ռուսաստանի պաշտպանության նախարար Սերգեյ Շոյգուն բանակցություններ է վարել Թուրքիայի պաշտպանության նախարար Հուլուսի Աքարի հետ։ Քննարկվել են «Սևծովյան հացահատիկի նախաձեռնության» շրջանակներում ուկրաինական նավահանգիստներից գյուղատնտեսական մթերքների արտահանման վերաբերյալ համաձայնագրերի կատարման կասեցման հարցերը»,- նշվում է հաղորդագրության մեջ:
ՌԴ ՊՆ-ն նախօրեին հայտարարել է հացահատիկի գործարքին մասնակցությունը կասեցնելու մասին։ Համապատասխան հանձնարարականներն արդեն ստացել են Ստամբուլի Համատեղ կոորդինացիոն կենտրոնում աշխատող ռուս մասնագետները, որտեղ ընթանում է ուկրաինական սննդամթերքի տեղափոխման վերահսկման գործընթացը։
Կրեմլի խոսնակ Դմիտրի Պեսկովը կարծում է, որ պարենային գործարք առանց Ռուսաստանի մասնակցության դժվար թե իրագործելի լինի։
