Պենտագոնը՝ ՌԴ-ի կողմից միջուկային զորավարժության անցկացման մասին
ԱՄՆ-ը ռուսական միջուկային զորավարժություններում տակտիկական միջուկային զենքի կիրառման նախապատրաստման նշաններ չի տեսնում: Այս մասին հայտարարել է ԱՄՆ պաշտպանության նախարարության ղեկավար Լլոյդ Օսթինը։
«Մենք այս պահին որևէ բան չենք տեսել, որը մեզ հիմք կտար մտածելու, որ սա ինչ-որ ծածկված օպերացիա է»,- BBC-ի ռուսական ծառայության փոխանցմամբ՝ այս մասին ասել է Պենտագոնի ղեկավարը:
Օսթինը հավելել է, որ չի հավատում, թե ՌԴ նախագահ Պուտինը որոշում է կայացրել կիրառել մարտավարական միջուկային զենք, և հրաժարվել է ասել, թե որը կարող է լինել Արևմուտքի պատասխանը։
«Մենք ի սկզբանե շատ հստակ ասել ենք, որ միջազգային հանրության կողմից լինելու է շատ զգալի արձագանք»,- ասել է նա։
