Սի Ծինփինը կրկին ընտրվել է Չինաստանի Կոմունիստական կուսակցության գլխավոր քարտուղար
Չինաստանի Կոմունիստական կուսակցության կենտրոնական կոմիտեն երրորդ ժամկետով Սի Ծինփինին ընտրել է գլխավոր քարտուղար։ Քվեարկությունը տեղի է ունեցել կուսակցության 20-րդ գումարման Կենտրոնական կոմիտեի առաջին պլենումում, հայտնում է «Սինհուա» լրատվական գործակալությունը։
Սի Ծինփինը պլենումում նշանակվել է նաև կուսակցության կենտրոնական ռազմական խորհրդի նախագահ։
ՌԴ նախագահ Վլադիմիր Պուտինը և Բելառուսի նախագահ Ալեքսանդր Լուկաշենկոն արդեն շնորհավորել են Սի Ծինփինին` գլխավոր քարտուղար նշանակվելու կապակցությամբ:
