Պուտինը չի կատակում․ Բայդենը նախազգուշացրել է հնարավոր արմագեդոնի մասին
ԱՄՆ նախագահ Ջո Բայդենը նախազգուշացրել է ռուսական միջուկային սպառնալիքների հետ կապված վտանգի մասին։ Այդ մասին նա հայտարարել է հոկտեմբերի 6-ին Նյու Յորքում Դեմոկրատական կուսակցության բարեգործական միջոցառման ժամանակ, հայտնում է CNN-ը։
«Կուբայի հրթիռային ճգնաժամից հետո առաջին անգամ մենք միջուկային զենքի կիրառման անմիջական սպառնալիք ունենք... Չեմ կարծում, որ հնարավոր է հեշտությամբ (օգտագործել) տակտիկական միջուկային զենքը և չհայտնվել Արմագեդոնում»,- ասել է ամերիկացի առաջնորդը։
Նրա խոսքով՝ ՌԴ նախագահ Վլադիմիր Պուտինը չի կատակում, երբ խոսում է մարտավարական միջուկային զենքի, կամ կենսաբանական կամ քիմիական զենքի հնարավոր կիրառման մասին։
Դա, ըստ ամերիկացի առաջնորդի, հետեւանք է այն բանի, որ ռուսական բանակը ձախողվում է Ուկրաինայում։
Հեռուստաալիքն ուշադրություն է հրավիրել այն փաստի վրա, որ ԱՄՆ Ազգային անվտանգության խորհուրդը, Պետդեպարտամենտը և Պենտագոնն ավելի զուսպ են միջուկային սպառնալիքի վերաբերյալ իրենց գնահատականներում։
Բայդենի հայտարարությունից հետո ԱՄՆ պաշտոնյաները CNN-ի հետ զրույցում ընդգծել են, որ իրենք փոփոխություն չեն տեսնում Ռուսաստանի միջուկային դիրքորոշման մեջ:
