Խորհուրդ են տվել «Թեժ գիծ» զանգել. ՊՆ ներկայացուցիչը զրուցել է ծնողների հետ
Պաշտպանության նախարարության առջև հավաքված ծնողների հետ անցակետի մոտ զրուցել է ՊՆ ներկայացուցիչը։
«Մեզ ասացին` սպասեք, որոնողական աշխատանքները շարունակվում են և լուր լինի, կպատասխանենք։ Իմ որդին` զինծառայող Սամվել Աթանյանը, 2 ամսվա զինվոր էր. նրան սեպտեմբերի 12-ին տարել են Ներքին Հանդ` ինժեներական աշխատանքների։ Դրանից հետո որևէ լուր չկա մեր տղաներից, վերջին անգամ տեսել են շինաշխատանքներ կատարելիս։ Մեզ ասում են, որ կան զոհվածներ, վիրավորներ»,–ասաց Հայկ Անթանյանը։
Ըստ Աթայանի` դիվիզիոնի հրամանատարը ողջ է, սակայն իրենց հետ որևէ մեկը չի հանդիպել և որևէ լուր չեն տալիս ծնողներին։ Նրա խոսքով` ծնողներին հաջողվել է միայն անտառապահի հետ զրուցել։
Մեկ ուրիշ տղամարդ էլ հայտնեց` ՊՆ-ից իրենց խորհուրդ են տվել «Թեժ գիծ» զանգել, տեղեկատվություն ստանալ։
Հիշեցնենք` ադրբեջանական վերջին ագրեսիայից հետո անհետ կորած զինծառայողների հարազատները բողոքի ակցիա էին իրականացնում Հայաստանի ՊՆ-ի շենքի մոտ:
