Ներքին Հանդի գյուղապետն ասել է, թե ինչու չի դիմավորել Աննա Հակոբյանին
Ներքին Հանդի գյուղապետ Խաչատուր Բաղդասարյանը Աննա Հակոբյանին չի դիմավորել առողջական խնդիրների պատճառով: Այս մասին NEWS.am-ի հետ զրույցում ասել է Բաղդասարյանը:
«Ես առողջական խնդիրներ ունեմ, ի վիճակի չեմ եղել դիմավորել: Բայց գիտեմ, որ իրեն գյուղացիներ են դիմավորել, հարցեր են ուղղել, բայց կոնկրետ ինչ են խոսել՝ դեռ չգիտեմ: Եթե կարողանայի, հաստատ կդիմավորեի, ես էլ հարցեր ունեի»,- նշել է Բաղդասարյանը:
Հիշեցնենք, որ Աննա Հակոբյանը հուլիսի 6-ից Սյունիքի մարզում է: Նա այցելել է մի քանի համայնքներ:
Մասնավորապես Քաջարան այցը աղմուկ էր բարձրացրել, քանի որ համայնքապետ Մանվել Փարամազյանը նրան ծաղիկներով էր դիմավորել: Փաշինյանի օրոք անազատության մեջ հայտնված Փարամազյանին շատերը քննադատեցին արարքի համար, այդ թվում նաև «Վերածնվող Հայաստան» կուսակցության անդամները։ Ավելի ուշ հայտնի դարձավ, որ Փարամազյանն այլևս այդ կուսակցության անդամ չէ։
