«Չկարողացանք հասնել կազմակերպվածության այն բարձր մակարդակին, որ իշխանությունը չդիմանա»․ Սաղաթելյան
Այսօր Ֆրանսիայի հրապարակին հարակից այգում կազմակերպված մամուլի ասուլիսի ժամանակ ԱԺ փոխխոսնակ Իշխան Սաղաթելյանը՝ անդրադառնալով հարցին, թե ինչպե՞ս են պատրաստվում հասնել իշխանափոխության, պատասխանեց, որ այն, ինչն արել են այս ժամանակահատվածում, սրա հիման վրա պետք է կառուցեն պայքարի հաջորդ փուլը:
«Մենք ունեինք հանրահավաքների օրերին տասնյակ հազարավոր քաղաքացիներ, բայց չկարողացանք հասնել կազմակերպվածության այն բարձր մակարդակին, որ մեր հանրահավաքներին մասնակցող քաղաքացիներից ձևավորենք կազմակերպված, կանոնավոր քաղաքացիական բանակ, որ կարող էր անհնազանդության ակցիաները հասնել այն ծավալին, որ իշխանությունը չդիմանար: Մենք պետք է ձգտենք հասնել դրան, որ ոստիկանական ուժերը չկարողանան դիմադրել հանրությանը և զեկուցեն, որ իրավիճակն այլեւս անկառավարելի է: Դրա բոլոր հիմքերը կան: Պետք է գնանք այդ ճանապարհով»,-ասաց Սաղաթելյանը:
