Ինչպես է Ստեփանակերտում իրականացվում ձնամաքրման աշխատանքները

Այսօր՝ մարտի 21-ին, ԱՀ նախագահի հանձնարարականով` պետական բոլոր հիմնարկների աշխատողներն իրենց աշխատավայրում հարակից տարածքներում իրականացրել են ձնամաքրման աշխատանքներ: Այս մասին հայտնում է «Արցախպրես»-ը։

Լրատվամիջոցի հետ զրույցում ԱՀ նախագահի աշխատակազմի տեղեկատվության գլխավոր վարչության հանրային կապերի և տեղեկատվական քաղաքականության համակարգման բաժնի վարիչ Մարինե Հակոբջանյանն ասել է, որ Նախագահի աշխատակազմն էլ է ներգրավվել մայրաքաղաքի ձնամաքրման աշխատանքներին:

«Բոլորիս համար վերջին տարիների կտրվածքով աննախադեպ երևույթ է Արցախում ձյան նման առատությունը: Հանրապետության տարածքում ձնամաքրման աշխատանքները թողնել միայն Ստեփանակերտի քաղաքապետարանի համապատասխան կառույցների վրա, ճիշտ չէ՝ հաշվի առնելով ռեսուրսների և հնարավորությունների սահմանափակ լինելը: Ամեն մեկիս պարտքն է մասնակից լինել ձնամաքրման աշխատանքներին ու մեր ավանդը բերել մայրաքաղաքի կենսագործունեության վերականգնման գործին, որպեսզի ոչ մի խափանում չլինի, բոլոր ծառայությունները գործեն բնականոն»,-նշել է Հակոբջանյանը:

[eb1531e30cc637723620f79e5c359692.jpg]