Ավստրալիայի պատժամիջոցները Ռուսաստանի դեմ
Ավստրալիան տնտեսական պատժամիջոցներ է սահմանում Ռուսաստանի դեմ։ Դա պայմանավորված է Մոսկվայի կողմից Դոնեցկի և Լուգանսկի Ժողովրդական Հանրապետությունների անկախության ճանաչմամբ։ Այս մասին հայտարարել է վարչապետ Սքոթ Մորիսոնը։
«Ավստրալիան նաև նպատակաուղղված պատժամիջոցներ կկիրառի ութ ռուսաստանցու նկատմամբ: Նրանց կարգելվի մուտք գործել Ավստրալիա և ավստրալական կառույցների ու կազմակերպությունների հետ կապված ցանկացած ֆինանսական գործարք կնքել», – մեջբերում է The Australian թերթը Մորիսոնի խոսքերը:
«Սահմանափակող միջոցները կազդեն նաև ռուսական բանկերի վրա»,- ասել է Ավստրալիայի վարչապետը։
ՌԴ ԱԳՆ պաշտոնական ներկայացուցիչ Մարիա Զախարովան Ռուսաստանի դեմ արևմտյան նոր պատժամիջոցներն անվանել է ոչ լեգիտիմ։ Դիվանագետը նշել է, որ Մոսկվան վաղուց է հասկացել, որ սահմանափակումներն Արևմուտքի միակ գործիքն են Ռուսաստանի Դաշնության դեմ՝ նրա զարգացումը զսպելու համար։
