«100 նոր դպրոց կունենանք մինչև տարեվերջ». Փաշինյան
2022 թվականին ունենք 173 սուբվենցիոն ծրագրի հայտ՝ միայն մանկապարտեզների մասով, դրանցից 38-ը ամբողջովին նոր մանկապարտեզներ կառուցելու, իսկ մյուսները հիմնանորոգումների, վերանորոգումների կամ բարեկարգումների վերաբերյալ են: Այս մասին կառավարության այսօրվա նիստում հայտարարեց ՏԿԵ նախարար Գնել Սանոսյանը:
Արձագանքելով վարչապետ Նիկոլ Փաշինյանը նշել է, որ խնդիր է դրվել մինչեւ 2026 թվականը 500 մանկապարտեզ կառուցել։ «Եթե հաշվում ենք այս ծրագիրը, եթե նկատի ենք ունենում պետական բյուջեով եւ հիմնադրամներով նորոգվողները, մենք մինչեւ 2026-ը ակնհայտորեն 500-ից ավելի մանկապարտեզ կկառուցենք: Մանկապարտեզի կառուցման, վերակառուցման, հիմնանորոգման մեջ մտնում է շենքի ամբողջական նորոգում, հիմնովին նոր գույք, միջավայրի հիմնովին թարմացում կամ կառուցում»,- հայտարարել է Նիկոլ Փաշինյանը:
Միաժամանակ նա նշել է, որ 2022 թվականի դեկտեմբերին պետք է 100 նոր դպրոց ունենանք՝ ներառյալ այն դպրոցները, որոնց շինարարությունը սկսվել է 2021-ին:
«Մենք անընդհատ ստանում ենք ահազանգ, որ տեխնիկական հսկողության ինստիտուտը մեր երկրում չի կայանում. պետք է մտածել՝ ինչ անել, որ ինստիտուտը կայանա, հրավիրում եմ փոխվարչապետների ուշադրությունը», - ասաց վարչապետը:
