Թուրքմենստանի նախագահը հանձնարարել է մարել ավելի քան 50 տարի վառվող «Դժոխքի դարպասներ» խառնարանը

Թուրքմենստանի նախագահ Գուրբամգուլի Բերդիմուհամեդովը, ելույթ ունենալով հանրապետության կառավարության նիստի ժամանակ, հանձնարարություն է տվել Կարակումներ անապատում գտնվող գազային խառնարանը հանգցնելու տարբերակ գտնել, որը հայտնի է «Դժոխքի դարպասներ» անունով: Այս մասին հայտնում է Turkmenportal կայքը:

Համապատասխան հանձնարարությունը նախագահը տվել է երկրի փոխվարչապետ Շահիմ Աբդրահմանովին, որը զբաղվում է նավթագազային համալիրի հարցերով:

Պարբերականի տվյալներով՝ երկրի ղեկավարը նման որոշում է կայացրել բնական գազի այրման հետևանքով տարածաշրջանի էկոլոգիայի վրա բացասական ազդեցության պատճառով: Նախագահն ընդգծել է, որ խառնարանի գազը կարելի է օգտագործել տեղի համայնքներում կյանքի որակի բարելավման նպատակով: Բերդիմուհամեդովը չի բացառել խառնարանի մարման աշխատանքներին օտարերկրացի մասնագետների ներգրավումը:

Անապատում գտնվող գազային խառնարանը, որը գտնվում է մայրաքաղաք Աշխաբադից 266 կմ հեռավորությամբ, ի հայտ է եկել 1971 թվականին՝ այդ վայրում գտնվող  հետախուզական հանքի փլուզման հետևանքով: 60 մետր տրամագիծ և 20 մետր խորություն ունեցող խառնարանն արդյունքում ստացել է «Դժոխքի դարպասներ» անվանումը: Խառնարանից բարձրացող կրակի սյունը կարող է հասնել 15 մետր բարձրության: