Ես իր մասնագիտական որակները շատ բարձր եմ գնահատում, բայց քաղաքականությունը շատ-շատ էր. Աղազարյանը՝ ՄԻՊ-ին

«Քաղաքացիական պայմանագիր» խմբակցության պատգամավոր Հովիկ Աղազարյանը չգիտի, թե ինչո՞ւ է իրենց խմբակցությունն այդքան շտապել՝ ՄԻՊ թեկնածու առաջադրելու հարցում՝ միգուցե այդպիսի ընթացակարգ կա. ArmDaily.am-ի հետ զրույցի ժամանակ ենթադրեց Աղազարյանը: 

Ինչ վերաբերում է արևելագետ Քրիստինե Գրիգորյանի թեկնածության վրա կանգնելուն, պատգամավորն ասաց. «Այնքանով, որքանով, որ ես ճանաչում եմ և այնքանով, որքանով, որ ես հասկացա իր մոտեցումները, պատկերացումները այդ պատասխանատու պաշտոնում ընտրվելու կապակցությամբ ես գտնում եմ, որ ինքը կարող է, այո: Հիմա դե միայն իր թեկնածությունը չի եղել, շատ թեկնածություններ են եղել, որոնցից ընտրվել է ինքը»: 

Աղազարյանից հետաքրքրվեցինք՝ ինչո՞ւ հենց Գրիգորյանը. «Դե մեկը պիտի ընտրվեր վերջին հաշվով: Քննարկումների արդյունքում եկել ենք այդ եզրահանգման»: 

ՔՊ պատգամավորը ժխտեց, որ եղել են թեկնածուներ, ովքեր մերժել են ՔՊ-ի կողմից առաջադրվել ՄԻՊ-ի պաշտոնում: 

Ներկա ՄԻՊ Արման Թաթոյանի մասնագիտական որակները Աղազարյանը շատ բարձր է գնահատում, սակայն շեշտում է՝ Թաթոյանի մոտ քաղաքականությունը շատ–շատ էր: 

«Ես իր մասնագիտական որակները շատ բարձր եմ գնահատում, բայց քաղաքականությունը շատ-շատ էր, եթե քաղաքականության դոզան մի քիչ քիչ լիներ կամ ընդհանրապես չպետք է լինի, ապա ինքը շատ լավ կկատարեր իր պարտականություննները Սահմանադրությամբ նախատեսված լիազորությունների շրջանակում: Ես գտնում եմ, որ իր մոտ քաղաքականությունը շատ-շատ էր, որը վեր էր ածվում տենդենցիոզության»,- նշեց Աղազարյանը: 

Հարցին, թե Թաթոյանը լավ քաղաքական գործիչ կլինի՝ Աղազառյանը պատասխանեց. «Այո, կուզենայի նման քաղաքական օպոնենտ ունենալ»: