Սրանք կարևոր ցուցմունքներ են, որոնք հետագայում անհրաժեշտ կլինեն. Աբրահամյանը՝ Փաշինյանի պատասխանների մասին

Որևէ պաշտոնյա, այդ թվում Նիկոլ Փաշինյանը, երբևէ չի կարողացել այդ տոնով ինձ հետ խոսել։ ԱԺ-ում ճեպազրույցի ժամանակ այս մասին ասաց «Պատիվ ունեմ» խմբակցության պատգամավոր Տիգրան Աբրահամյանը՝ անդրադառնալով դիտարկմանը, որ կառավարության հետ հարցուպատասխանի ժամանակ, երբ վերջինս ՀՀ վարչապետ Նիկոլ Փաշինյանին հարցեր է ուղղում, դրան ի պատասխան վարչապետը նրան է վատ դրության մեջ գցում։

«Այդ հարցադրումների պատասխանները, եթե ոչ այսօր, ապա վաղը հնարավորություն են տալու կոնկրետ գործեր հարուցել և պատասխանատվության ենթարկել կոնկրետ անձանց։ Իմ հարցադրումներն այլ տոնայնության մեջ են, և ես որոշակի առումով բավարարված եմ այն բանից, ինչ ստանում եմ։ Կարծում եմ՝ սրանք դրվագներ, կարևոր ցուցմունքներ են, որոնք հետագայում անհրաժեշտ են լինելու ՀՀ-ին»,-նշեց պատգամավորը՝ ընդգծելով, որ իր հարցադրումները կոնկրետ նպատակներ ուներ:

Վերջինս նկատեց՝ գործող իշխանության օրոք օբյեկտիվ քննություն չի լինի, բայց չենք ապրում այսօրվա օրով միայն։ ՀՀ քաղաքացիներին անհրաժեշտ է տեսնել պատժվող պաշտոնյաներին, որոնք պատասխանատվություն են կրում երկրում ստեղծված ծանր իրավիճակի համար, և ժամանակ կգա, երբ դա կլինի։ Տիգրան Աբրահամյանը գտնում է, որ այսօր հիմքեր պետք է ստեղծեն, որ ինչ-որ փուլում ցանկացած պաշտոնյա իր արածների համար պատասխան կրի։