Քվեբեկում բուժաշխատողները դատի են տվել իշխանությանը՝ պարտադիր պատվաստման մասին վերջնագրից հետո

Կանադայում Քվեբեկ նահանգի Գերագույն դատարանը սկսել է ուսումնասիրել նահանգի բուժաշխատողների հայցն ընդդեմ տեղական իշխանությունների, որոնք վերջնագիր են ներկայացրել բուժանձնակազմին՝ մինչև նոյեմբերի 15-ը Covid-19-ի դեմ պարտադիր պատվաստում իրականացնելու վերաբերյալ: Այս մասին հայտնել է CBC հեռուստաալիքը։

Դատարանը վճիռ կկայացնի նոյեմբերի 15-ին: Առողջապահության ոլորտի չպատվաստված կամ իշխանություններին պատվաստումների վերաբերյալ անձնական տվյալներ տրամադրելուց հրաժարվող աշխատակիցների փաստաբանները հայտնել են, որ Քվեբեկի կառավարության որոշումն ավելի շատ վնաս կհասցնի տարածաշրջանի բնակչությանը, քան օգուտ:
 

Ավելի վաղ Քվեբեկի իշխանությունները հայտարարել էին, որ նահանգի բոլոր բուժաշխատողները պետք է մինչև հոկտեմբերի 15-ը պարտադիր պատվաստում անցնեն կորոնավիրուսի դեմ, հակառակ դեպքում կկորցնեն իրենց աշխատանքը, քանի դեռ չեն ավարտել իմունիզացիայի ամբողջական կուրսը։ Ավելի ուշ վերջնագրի ժամկետը հետաձգվեց մինչև նոյեմբերի 15-ը։
 

Հոկտեմբերի 13-ին Քվեբեկի առողջապահության նախարարը հայտարարել էր, որ տարածաշրջանի բժշկական հաստատությունների բոլոր աշխատակիցների 96%-ն ավարտել է պատվաստումների ամբողջական կուրսը, իսկ 21,9 հազար մարդ կամ չի ավարտել այն, կամ չի ընդունել պատվաստանյութի առաջին չափաբաժինը: