Թույլ չենք տա. Իրանի նախագահը հերթական զգուշացումն է ուղղել տարածաշրջանն ապակայունացնողներին
Արտաքին ուժերը տարածաշրջանի ժողովուրդներին բարին չեն ցանկանում, սակայն Իրանը թույլ չի տա սիոնիստներին փչացնել իր հարաբերությունները հարևանների հետ: Այս մասին հինգշաբթի օրը հայտարարել է Իրանի նախագահ Էբրահիմ Ռաիսին՝ խորհրդարանում Արևելյան և Արևմտյան Ադրբեջանի նահանգների ներկայացուցիչների հետ հանդիպման ժամանակ: «Տարածաշրջանի օտարերկրացիները հետապնդում են իրենց սեփական շահերը, բայց մենք թույլ չենք տա, որ սիոնիստները խաթարեն մեր հարաբերությունները մեր հարևանների հետ: Բարիդրացիական հարաբերությունները, տնտեսական և առևտրային հարաբերությունները, ինչպես նաև սահմանային շուկաների աշխուժացումը Իրանի Իսլամական Հանրապետության առաջնահերթություններից են»,- ասել է Իրանի նախագահը:
