Գեղարքունիքում այնպիսի դիրքեր են գրավել, որտեղից հնարավոր է մի քանի ժամվա ընթացքում կտրել Սյունիքի կապը ՀՀ-ի հետ. Հրանտ Մելիք-Շահնազարյան
Քաղաքական ուժերն ու փորձագետները, մասնագետները չպետք է վարանեն հանրությանը ներկայացնել ճշմարտությունը, բարձրաձայնել, որ հակամարտությունը լուծված չէ, իսկ Ադրբեջանն ունի հեռահար նպատակներ։
«Հանրության համակերպվողի կեցվածքը հարկավոր է փոխել և արմատավորել սեփական իրավունքներին հետամուտ լինելու գիտակցումը՝ ինչպես Սյունիքին և Արցախին, այնպես էլ ամբողջ Հայաստանին վերաբերող հարցերում։
Մարդիկ պետք է գիտակցեն, որ Սյունիքի խնդիրն առանձին դիտարկելը ճիշտ չէ, քանի որ Ադրբեջանն իր հեռահար ծրագրերն իրականացնելիս կոնկրետ գործողություններ է անում։
Նրանք Գեղարքունիքում այնպիսի դիրքեր են գրավել, որտեղից հնարավոր է մի քանի ժամվա ընթացքում կտրել Սելիմի լեռնանցքը և Սյունիքի կապը ՀՀ-ի հետ ամբողջ տարածքով չեզոքացնել։Երբ մենք խոսում ենք որպես աշխարհաքաղաքական գործոն՝ Հայաստանի, նաև Արցախի դերակատարության բարձրացման մասին, մեր հիմնական խնդիրը պետք է լինի ցույց տալ աշխարհին, որ հայ ժողովուրդը՝ լինի Արցախում, ՀՀ-ում, թե Սփյուռքում, չի համակերպվել պատերազմի արդյունքների հետ, չի համակերպվել այն իրականության հետ, որն այսօր աշխարհին մատուցվում է»,- այս մասին «ՀՀ-ին և Արցախին սպառնացող վտանգները և հաղթահարման ուղիները» թեմայով քննարկման ընթացքում ասաց քաղաքագետ Հրանտ Մելիք-Շահնազարյանը։
