«Թալիբան»-ի բարձրաստիճան պատվիրակությունը Թուրքիայում է․ ինչի շուրջ են խոսելու
«Թալիբան»-ի բարձրաստիճան պատվիրակությունը ժամանել է Թուրքիա՝ թուրք պաշտոնյաների հետ բանակցությունների համար:
Սա թալիբների եւ Թուրքիայի կառավարության բարձրաստիճան պաշտոնյաների առաջին հանդիպումն է այն բանից հետո, երբ խումբը վերահսկողություն հաստատեց Աֆղանստանի վրա: Ըստ «Թալիբան» շարժման ներկայացուցչի՝ այցով ժամանող պատվիրակությունը գլխավորում է արտաքին գործերի նախարարի պաշտոնակատար Ամիր Խան Մութաքին, հաղորդում է AP- ն:
Թուրքիան աշխատում է Քաթարի հետ Աֆղանստանի մայրաքաղաք Քաբուլում միջազգային չվերթների համար օդանավակայան բացելու ուղղությամբ: Սակայն առեւտրային չվերթների վերսկսումից առաջ վերանորոգում է պահանջվում:
Ներկայումս կա երկու փոխադրող՝ սլամաբադում տեղակայված Pakistan International Airlines-ը եւ Kam Air աֆղանական մասնավոր ընկերությունը, որը չարտերային թռիչքներ է իրականացնում, բայց՝ ապահովագրական բարձր ծախսերով:
«Թալիբան» շարժումը սպառնացել է արգելել ավիաընկերությունների թռիչքները, եթե դրանք չնվազեցնեն ծախսերը:
Քաբուլից Իսլամաբադ PIA-ի միակողմանի տոմսն արժե մոտ 2500 դոլար, օգոստոսին մինչ թալիբների՝ իշխանության գալը 300 դոլարի համեմատ:
Անկարա այցը տեղի է ունեցել այն բանից հետո, երբ «Թալիբան»-ի առաջնորդներն այս շաբաթ մի շարք հանդիպումներ են անցկացրել Դոհայում ԱՄՆ-ի, եվրոպական 10 երկրների եւ Եվրամիության ներկայացուցիչների հետ:
