ՀՀԿ-ական նախկին պատգամավորի որդի և բանակից ազատված. ով է Ջերմուկի քաղաքապետի նորանշանակ ժ/պ-ն․ Armdaily

Քիչ առաջ հայտնի դարձավ, որ Ջերմուկում համայնքապետի պաշտոնակատար է նշանակվել Վահագն Արսենյանը՝  ՀՀԿ-ական նախկին պատգամավոր Ջերմուկ Գրուպի սեփականատեր Աշոտ Արսենյանի որդին, գրում է Armdaily.am-ը։ 

«Վահագն Արսենյանի անունը մամուլում միշտ է եղել, բայց հատկանշական էր 2019 թվականը, երբ «Հետք»-ը պարզեց, որ կրտսեր Ասենյանի՝ զինծառայությունից ազատվելու հիմքով քրեական գործ է հարուցվել։ Գործը հարուցվել է քրեական օրենսգրքի 327 հոդվածի 2-րդ մասի 2-րդ կետի հանգամանքներով՝ փաստաթուղթ կեղծելու կամ խաբեության այլ ճանապարհով զինվորական ծառայությունից խուսափելու փաստի առթիվ:

Նշենք, որ  Արսենյանի երկու որդիներն էլ ազատվել են զինվորական ծառայությունից: Ավագ որդին՝ Արսեն Արսենյանը, ուսումնառության ընթացքում ամուսնացել է և զինծառայությունից ազատվել է ընտանեկան տարկետման՝ երկու երեխա ունենալու հիմքով, իսկ կրտսեր որդին՝ Վահագն Արսենյանը՝ առողջական հիմքով:

Իսկ հայր Արսենյանը՝ բոլորին հայտնի Ջերմուկի Արսենյան կամ Քլոսը նախկին իշխանությունների վառ ներկայացուցիչն է, ավելին՝ ոչ վաղ անցյալում մամուլը բազմաթիվ անգամներ գրել էր, որ  Արսենյանը Սերժ Սարգսյանի Բադեն-Բադեն այցի ժամանակ ուղեկիցն է եղել։ Իսկ այդ հայտնի այցը ներկայիս իշխանությունների «սիրելի խաղաքարտն» է նախկինների դեմ։

Արսենյանը նաև ՀՀԿ-ական այն պատգամավորների շարքին է պատկանում, ովքեր 2018 թվականի հոկտեմբերին հայտարարություն տարածեցին՝ դեկտեմբերին արտահերթ ընտրություններ անցկացնելու Նիկոլ Փաշինյանի դիրքորոշմանը միանալու մասին»,- ասվում է լրատվականի հրապարակման մեջ։