Շատ ասեցինք՝ հեսա գնում ենք Բաքու չայ խմելու, շատ ասեցինք, որ աշխարհի ամենամարտունակ բանակն ենք. Անդրանիկ Քոչարյան
1990-ական թվականներին մենք Գորիս-Կապան ճանապարհի վրա տվել ենք բազմաթիվ զոհեր, հակառակորդի բոլոր հենակետերը ոչնչացվել են, բայց այսօր ունենք այլ իրողություն և պետք է առաջ շարժվենք այդ իրողությունը հաշվի առնելով: Այս մասին այսօր ԱԺ-ում լրագրողների հետ զրույցում ասաց Պաշտպանության, ազգային անվտանգության հարցերի հանձնաժողովի նախագահ Անդրանիկ Քոչարյանը։
«Եթե մենք դասեր չքաղենք մեր պարտությունից և չկառուցենք մեր օրակարգն այնպես, որ կարողանանք այդ ճանապարհով անվտանգ անցնել, բնականաբար, անընդհատ խոսելու ենք այդ վտանգների մասին՝ այդպես էլ դասեր չքաղելով։90-ականներին հենց այդ ճանապարհի վրա է, որ ամենաթեժ կռիվներն է սկսվել 94թ-ի հրադադարի ռեժիժը հաստատվել է հենց այդ ճանապարհի խնդիրները լուծելով»,-ասաց Անդրանիկ Քոչարյանը:
Իսկ թե ինչո՞ւ իշխանությունը Շուշին և Հադրութը օկուպացված չի համարում և ի՞նչ պետք է անել օկուպացված տարածքները հետ բերելու ուղղությամբ պատգամավորը պատասխանեց.
«Պետք է պատրաստ լինել, որ ինչ-որ հնարավորության ունենալու դեպքում մեր երկիրն անվտանգային խնդիրներն անթերի կատարի: Դա Դուք հիմա այնպիսի հարցադրումներ եք անում, որ մենք արդեն պետք է Բաքուն գրավենք:
Մեր ժողովրդին շատ ասեցինք, որ հեսա գնում ենք Բաքու՝ չայ խմելու, շատ ասեցինք, որ աշխարհի ամենամարտունակ բանակն ենք։ Մենք ամեն ինչ արեցինք, որ աշխարհի ամենամարտունակ բանակը լինի այդպիսին»,- ասաց Քոչարյանը:
