Իրանական պատվիրակությունն ուղևորվել է Երևան․ ինչ են քննարկելու
Իրանական պատվիրակությունն ուղևորվել է Երևան՝ քննարկելու Իրանի մասնակցությունը Հայաստանում տարանցիկ ճանապարհի կառուցման աշխատանքներին, որն այլընտրանք է լինելու Գորիս-Կապան միջպետական ճանապարհին: Տեղեկությունը հաղորդում է Mehr գործակալությունը։
Իրանական պատվիրակությունը գլխավորում է Իրանի ճանապարհների և քաղաքաշինության հարցով փոխնախարար և տրանսպորտային ենթակառուցվածքների զարգացման գործակալության գլխավոր տնօրեն Խեյրոլլահ Խադեմին:
Հիշեցնենք, որ վերջին մեկ ամսվա ընթացքում Ադրբեջանը խիստ կանոններ է սահմանել իրանական բեռնատարների նկատմամբ, որոնք հատում են Սյունիքում տեղակայված ադրբեջանական անցակետը։
«Սա այն դեպքում, երբ Նորդուզ սահմանային անցակետից մինչև Երևան 400 կմ ճանապարհի միայն 20 կմ-ն է անցնում «Ադրբեջանի Հանրապետության տարածքը»»,- գրում է լրատվականը։
Իրանական բեռնատարների վարորդները բախվել են այնպիսի դժվարությունների, ինչպիսիք են 20-կիլոմետրանոց երթուղին հատելու համար լրացուցիչ տուրքերի վճարումը:
