Վրաստանը Սաակաշվիլիին չի փոխանցի ուկրաինական կողմին

Վրաստանը չի ցանկանում նախկին նախագահ Միխեիլ Սաակաշվիլիին փոխանցել ուկրաինական կողմին: Երկրի փոխվարչապետ, մշակույթի, սպորտի և երիտասարդության նախարար Թեյա Ցուլուկիանին այսօր ասել է, որ քաղաքական գործիչը Վրաստանում կանցկացնի իր ազատազրկման ժամկետը:

«Եթե մենք խոսում ենք Սաակաշվիլիին Ուկրաինային հանձնելու մասին, որպեսզի նա խուսափի վրացական դատարանի կողմից իրեն տրված ազատազրկումից, ապա մենք ցանկություն չունենք դա անել: Դրա իրավական նպատակահարմարությունը չկա»,- ասել է Ցուլուկիանին՝ հավելելով, որ նախկին նախագահը լինելու է վրացական բանտում:

Ցուլուկիանին, որը Վրաստանի արդարադատության նախարարն էր 2012-2020 թվականներին, մեկնաբանել է նաև Սաակաշվիլիին Ուկրաինային հնարավոր արտահանձնման հարցը՝ նշելով, որ այստեղ նույնպես իրավական հիմք չկա:

«Վրաստանից Ուկրաինա հանձնումը տեղի է ունենում միայն այն դեպքում, երբ անձը, ում արտահանձնման պահանջը պահանջում է մյուս կողմը, այնտեղ պետք է կանգնի դատարանի առջև: Ես չեմ կարծում, ամեն դեպքում՝ տեղեկություն չունեմ, որ Սաակաշվիլին հետապնդման է ենթարկվել Ուկրաինայում: Հետևաբար, արտահանձնման մասին խոսակցությունները իրավական անհեթեթություններ են, այսինքն՝ նոնսենս»,- ավելացրել է նա:

Նախկին նախագահը ձերբակալվել է Վրաստանում հոկտեմբերի 1-ին:

Ուկրաինայի նախագահ Վլադիմիր Զելենսկին կիրակի օրը հայտարարել էր, որ Կիևը բոլոր ջանքերը կգործադրի՝ նրան հետ բերելու համար: