Փաշինյանի լուսանկարի ներքո վիրավորական գրառում անելու համար նոր գործով նյութեր են պատրաստվում. Առավոտ
Թեեւ միջազգային իրավապաշտպան Freedom House կազմակերպությունը արդեն իսկ քննադատել է Հայաստանի իշխանությանը վարչապետ Նիկոլ Փաշինյանի լուսանկարի տակ վիրավորական մեկնաբանություն գրելու համար 2 քրեական գործեր հարուցելու համար՝ նյութեր են նախապատրաստվում եւս մի նման գործ հարուցելու: «Առավոտին» հայտնի դարձավ՝ սեպտեմբերի 30-ին ոստիկանության Նոր Նորքի բաժնում գրություն է ստացվել, որ Մուշեղ Շուշանյանը Ֆեյսբուք սոց.ցանցի իր էջով ՀՀ վարչապետ Նիկոլ Փաշինյանի լուսանկարի ներքո կատարել է վիրավորանք պարունակող գրառում: Ձեռնարկվում են միջոցառումներ Մ.Շուշանյանին հայտնաբերելու ուղղությամբ: Նախապատրաստվում են նյութեր:
Ըստ ամենայնի՝ խոսքը փաստաբան Մուշեղ Շուշանյանի մասին է, որի նկատմամբ Երևանի ընդհանուր իրավասության դատարանում ընթանում է դատավարություն:
Մուշեղ Շուշանյանին առաջադրված մեղադրանքն է. «Նա, հանրության լայն շրջանակների համար հասանելի «Ֆեյսբուք» սոցիալական ցանցում գրանցված լինելով օգտատիրոջ տվյալներով, անձի՝ ՀՀ վարչապետի նկատմամբ, քաղաքական և այլ հայացքներով պայմանավորված, ՀՀ-ում հետպատերազմյան իրադրությամբ պայմանավորված հասարակության մոտ առկա տրամադրությունները և սոցիալ-հոգեբանական խոցելի իրավիճակն օգտագործելով, հրապարակային՝ իր «հետևորդների», «ընկերների» և կայքէջ մուտք գործած այլ օգտատերերի համար անմիջականորեն տեսանելի եղանակով, դիտավորությամբ հնչեցրել է բռնություն գործադրելու հրապարակային կոչեր և արդարացրել է նման բռնությունը, մասնավորապես 2020 թվականի դեկտեմբերի 13-ին իր հիշյալ կայքէջում կատարելով հետևյալ բովանդակությամբ գրառումը.
«Կիկոլին դատելը միգուցե ցանկալի կլիներ՝ դավաճանության լիարժեք պատկերը ստանալու առումով, բայց նրան դատելն անիրատեսական է: Կիկոլի մահավճիռը կայացված է, մահապատիժը պետք է ի կատար ածվի: Ու նա նույնիսկ արժանի չէ թալեաթի պես արժանապատիվ շանսատակ արվելուն՝ նրա ու նրա պիղծ ընտանիքի պատիժը լինելու է անգութ, դաժան և արդար»:
Ինչպես նաև 2020 թվականի դեկտեմբերի 14-ին կրկին նույն կայքէջում կատարելով հետևյալ բովանդակությամբ գրառումը.
«Սա ավելի վտանգավոր թշնամի ու թուրք է, քան ամենաիսկական թուրքը: Նա վտանգավոր է, քան էնվերը, թալեաթը, աթաթուրքը: Սա թուրքերի կողմից ներդրված «ական» է՝ Հայոց ցեղասպանությունն ավարտին հասցնելու և հայության վերջին ծվենների ոչնչացման զենք: Ուստի այս ու սրա պիղծ ընտանիքը ենթակա են ոչնչացման: Սատկացրեք սրան, Հայեր»՝ նշված կոչի ներքևի հատվածում տեղադրելով ՀՀ վարչապետի նկարը»:
Փաստաբանի նկատմամբ խափանման միջոց է կիրառված քաղաքից չբացակայելու ստորագրությունը և նա դատարանում միջնորդել է կալանավորել իրեն, ու «Հրապարակին» տված հարցազրույցում էլ ասել է.
«Ուզում են էս գործով դատեն, դատապարտեն, ուզում են ևս մի քանի գործ հարուցեն, իմ համոզմունքն է դա, որ Նիկոլ Փաշինյան անձնավորությունը ազգային և պետական դավաճան է, պայմանավորված պատերազմի է գնացել մեր հայրենիքի մի մասը թշնամուն հանձնելու նպատակով, թշնամու հետ գործարքի մեջ է գտնվել, կոլաբորանտ է ինքը, այսինքն՝ գործում է ի շահ թշնամու։ Դա իմ համոզմունքն է, և որևէ մեկը որևէ միջոցով, քրեական հետապնդումներով և այլն, չի կարող ինձ լռեցնել, արգելել, որ ես իմ համոզմունքները ըստ անհրաժեշտության հրապարակայնացնեմ»: Կարդացեք նաև «Մենք ամբաստանյալ չենք, մենք հերոս ենք․․․»:
