Ռուսական կողմը Երևանին և Բաքվին առաջարկ է փոխանցել. Զայցև

ՌԴ ԱԳՆ տեղեկատվության և մամուլի վարչության պետի տեղակալ Ալեքսեյ Զայցևը հինգշաբթի կայացած ճեպազրույցի ժամանակ անդրադարձել է սեպտեմբերի ԵԽԽՎ նիստում ընդունված «Ադրբեջանի և Հայաստանի միջև հակամարտության հումանիտար հետևանքների» մասին բանաձևին, որի շուրջ քվեարկությունից Ռուսաստանը զերծ էր մնացել:

«Այդ փաստաթղթի քննարկման ընթացքում ռուսական պատվիրակությունը դիմումներ է ստացել ինչպես հայ, այնպես էլ ադրբեջանցի գործընկերներից: Հաշվի առնելով Ռուսաստանի միջնորդական դերը՝ մեր պատվիրակությունը չի մասնակցել փաստաթղթի շուրջ քվեարկությանը, որի դրույթները հակասություններ են առաջացրել կողմերի մոտ»,- նշել է Զայցևը:

«Մենք բազմիցս ընդգծել ենք, որ հայ-ադրբեջանական սահմանի առանձին հատվածներում խնդրահարույց միջադեպերի կայուն և երկարաժամկետ լուծումը սահմանազատման և դրան հաջորդող սահմանագծման հարցով հանձնաժողովի ստեղծումն է: Ռուսական կողմը ձևավորել և Բաքվի ու Երևանի դիտարկմանն է փոխանցել համապատասխան բանակցային գործընթացի գործարկման ապահովման առաջարկը: Սպասում ենք գործընկերների արձագանքին»,- հավելել է ՌԴ ԱԳՆ ներկայացուցիչը: