Ռուսաստանը ո՞ր դեպքում կճանաչի «Թալիբան»-ի իշխանությունը. Լավրովը մանրամասնում է
«Թալիբան» շարժման պաշտոնական ճանաչման հարցը կդիտարկվի՝ կախված դրա գործողություններից, ասել է ՌԴ արտգործնախարար Սերգեյ Լավրովը, փոխանցել է ՌԻԱ Նովոստի-ն:
«Կախված նրանից, թե ինչպես «Թալիբան»-ը կկատարի իր հայտարարած նպատակներն ու իշխանության սկզբունքները, այդ ճանաչումը կդիտարկվի կոնկրետ իմաստով», - ասել է Լավրովը:
«Այժմ բոլորը խոսում են թալիբների հետ հարաբերությունների հաստատման անհրաժեշտության մասին: Այդ թվում՝ նրանք, ովքեր շտապ հեռացրել են իրենց դեսպանությունները երկրից, ինչը մենք չենք արել ... «Թալիբան»-ի հետ անխուսափելիորեն ստիպված ենք լինելու խոսել: Գրեթե բոլորն են ստիպված դա անել», - ասել է նախարարը: «ՌԴ դեսպանությունը գործում է: Մենք օպտիմալացրել ենք դրա անձնկազմը, ընտանիքների գրեթե բոլոր անդամները` կանայք եւ երեխաները, մեկնել են: Սակայն մարտունակ աշխատակազմը (մնացել է - խմբ.), նրանք մեզ բավականին օգտակար տեղեկատվություն են տրամադրում, որը օգտագործում ենք օտարերկրյա գործընկերների հետ շփումների ժամանակ», - հավելել է Լավրովը:
Նրա խոսքով՝ թալիբները հայտարարել են, որ մտադիր չեն յուրացնել իշխանությունը: «Մենք ծանոթ ենք ու խրախուսում ենք «Թալիբան» շարժման հայտարարություններն այն մասին, որ նրանք մտադիր չեն յուրացնել իշխանությունը եւ որ ցանկանում են կառավարությունը դարձնել, ինչպես իրենք են ասում, ներառական», - ասել է Լավրովը:
