«Ի՞նչ ենք թողել կորցրած տարածքներում. Արցախում արված ներդրումները». գործարար
Միայն Արցախում ունեցել ենք 38 ՀԷԿ, որոնք ամբողջությամբ Արցախի էլեկտրաէներգիայի ինքնաբավություն էին ապահովում, և որոշակի սեզոնի նաև Հայաստանին էին էլեկտրական հոսանք տալիս: 38 ՀԷԿ-ից մնացել է ընդամենը 10-ը, այսինքն՝ 28-ը հանձնվել է: Ամեն ՀԷԿ-ը միջինը մոտ 7-8 մլն դոլար է: Մոտ 150 միլիոն դոլարի ներդրում միայն ՀԷԿ-երի տեսքով ենք կորցրել, 168 TV- ի «Ռեվյու» հաղորդմանն ասել է գործարար Հարություն Մնացականյանը, ով առաջիններից էր արձագանքել Նիկոլ Փաշինյանի այն հայտարարությանը, թե «Որ ասում եք՝ տարածքներ ենք կորցրել, ի՞նչ եք տեսել այնտեղ, ինչքա՞ն ներդրում է արվել»։
Մնացականյանը անդրադարձել է նաև Արցախում արված մյուս ներդրումներին։
«Շուշի քաղաքում քանի՞ խոշոր հյուրանոց գիտեք՝ «Շուշի-Ավան պլազա», «Շուշի պլազա», «Շուշի Գրանդ հոթել», տարբեր փոքր հյուրատներ, ռեստորաններ և այլն: Անդրադառնանք Թալիշի ձկնաբուծարանին, որտեղ արտադրում էին թառափի սև ձկնկիթ, որն արտահանվում էր Եվրոպա: Ահագին մեծ ծախսեր էին արվել: Մեծ Թաղեր համայնքում զրոյից ստեղծվել էր գինու գործարան՝ իր այգիներով, և մոտավոր արժեքը 30-40 մլն դոլար էր։ Անցյալ տարի առաջին անգամ պետք է գինի ստանային, խաղողի բերքահավաք էին արել, Գերմանիայից մասնագետ էին հրավիրել», - ասել է նա:
Հարություն Մնացականյանը հիշեցրել է «Կատարո» գինու գործարանի, ինչպես նաև Քաշաթաղի շրջանում արված ներդրումների մասին։
«Տներ էին սարքել, որպեսզի գյուղական բնակեցում տեղի ունենար: 24 մլն դոլար միայն ճանապարհաշինության վրա էր ծախսվել: Հիշեք՝ Քարվաճառի ճանապարհին քանի՛ ռեստորան մնաց Ադրբեջանին, գազալցակայաններ, բենզալցակայաններ, ու ամենակարևորներից մեկը՝ Շուշիում Եզնիկ Մոզյանի անվան արհեստագործական ուսումնարանը, որի նման որակյալ ուսումնարան նույնիսկ Հայաստանում չկար», - ասել է նա։
Գործարարը հարց է բարձրացրել, թե վերջին 3 տարիներին Փաշինյանի իշխանությունը որքա՞ն ներդրումներ է ներգրավել Արցախի համար։
«Եթե Նիկոլ Փաշինյանը գտնում է, որ դա ներդրում չէր, ես չեմ պատկերացնում, թե իր բերած ներդրումները որո՞նք էին այս 3-4 տարիներին: Ես Արցախում որևէ ներդրում չեմ տեսել իր կողմից: Մինչև պատերազմը խոսակցություն էր պտտվում, որ մոտավորապես 1000 հեկտար նռան այգիներ պետք է հիմնվեն, բայց դա Նիկոլ Փաշինյանի գործոնի հետ ընդհանրապես կապ չուներ», - նշել է Մնացականյանը։
