ԱԺ նախագահն ընդունել է լրագրողական կազմակերպությունների ներկայացուցիչներին
Ազգային ժողովի նախագահ Ալեն Սիմոնյանն ընդունեց Խոսքի ազատության պաշտպանության կոմիտե-ի նախագահ Աշոտ Մելիքյանին, Մեդիա նախաձեռնությունների կենտրոն-ի տնօրեն Նունե Սարգսյանին և Լրագրողների Ասպարեզ ակումբ-ի նախագահ Լեւոն Բարսեղյանին:
Հանդիպումն իրականացավ լրագրողների իրավունքների պաշտպանությամբ զբաղվող կազմակերպությունների նախաձեռնությամբ: Քննարկվեցին հուլիսի 30-ին փոփոխված Ազգային Ժողովի նստավայրի տարածքում եւ շենքում գործող անվտանգության կանոններում լրագրողների տեղաշարժին վերաբերող նորմերը, որոնց համաձայն պահպանվող օբյեկտի հատուկ վերահսկելի գոտիներում արգելվում է Ազգային ժողովում հավատարմագրված լրագրողներին զբաղվել մասնագիտական գործունեությամբ (ի դեպ՝ նշյալ կանոնները բխում են «Ազգային ժողովի կանոնակարգ» սահմանադրական օրենքի տրամաբանությունից): Խոսքը ՀՀ ԱԺ պատգամավորների եւ աշխատակազմի աշխատակիցների աշխատասենյակներ տանող միջանցքների մասին է:
Ի պատասխան այն հարցին, որ կանոնակարգումը լրագրողների մասնագիտական գործունեությանը խոչընդոտ կարող է հանդիսանալ՝ ԱԺ նախագահ Ալեն Սիմոնյանը նշեց, որ դրանց բնույթը բացառապես անվտանգության նորմերից է բխում: Նա հավելեց, որ այս պահին աշխատանքներ են տարվում լրագրողների գործունեությունն ԱԺ-ում առավել բարենպաստ դարձնելու համար՝ որպես օրինակ բերելով տեղեկատվական ցանկացած առիթի դեպքում համապատասխան բանախոսների ապահովումը: ԱԺ նախագահը տեղեկացրեց, որ օրերս լրագրողների հետ հանդիպման ընթացքում հայտնել է յուրաքանչյուր ամիս ճեպազրույց ունենալու հանձնառության մասին:
