Հիմնանորոգվում է Տաթև–Աղվանի–Կապան ճանապարհը
Սյունիքի մարզում հիմնանորոգվում է Տաթև–Աղվանի–Կապան ճանապարհը։ Տեղեկությունը հայտնում է ՀՀ տարածքային կառավարման և զարգացման նախարարի պաշտոնակատար Սուրեն Պապիկյանը, որը տեղում ծանոթացել է շինարարական աշխատանքներին։
Տաթև-Աղվանի-Կապան ճանապարհը 43 կմ երկարություն ունի և երեք հատված։
Առաջին` 12.5 կմ-ի հատվածի հիմնանորոգումը սկսվել էր նախորդ տարի, այն հիմա ասֆալտապատման փուլում է: Աշխատանքների ավարտը նախատեսված է այս տարի։ Կապալառու կազմակերպությունն է «Բիլդեր քոնսթրաքշըն» ՍՊԸ-ն։
Երկրորդ`17.5 կմ հատվածի հիմնանորոգումը մեկնարկել է այս ամռանը։ Այստեղ շինարարական աշխատանքներ է կատարում «Ոսմար» ՍՊԸ։
Երրորդ` 13 կմ հատվածում սկսվել է ասֆալտի ստորին շերտի տեղադրումը։ Սրա կապալառուն «Քարավան» ՍՊԸ-ն է։
Նշվում է, որ Տաթև–Աղվանի–Կապան ճանապարհի հիմնանորոգմամբ Սյունիքը կունենա միջպետական մայրուղին շրջանցող ռազմավարական կարևորագույն նշանակության ավտոճանապարհ։
Պապիկյանն այսօր հանդիպում է ունեցել նաև Մեղրի համայնքի ղեկավարի ժամանակավոր պաշտոնակատար Արարատ Թումանյանի հետ։
