Էլեկտրահարված 11-ամյա տղան շնչում է արհեստական շնչառության սարքով. բժիշկները պայքարում են տղայի կյանքի համար

Հունիսի 17-ին Երևանի Այրվածքաբանության ազգային կենտրոն տեղափոխված 11-ամյա Նարեկ Ք.-ն գտնվում է ծայրահեղ ծանր վիճակում: Տղան շնչում է արհեստական շնչառության սարքի միջոցով: Այս մասին գրում է Armtimes.com-ը:

Կենտրոնի փոխտնօրեն Կարինե Բաբայանը մեզ հետ զրույցում ասաց՝ տղայի մոտ առկա է 60 տոկոս մակերեսային և 20 տոկոս շնչուղիների այրվածք:

«Նրա մոտ առկա է էլեկտրական այրվածք՝ բոցով՝ առաջին, երկրորդ, երրորդ, չորրորդ աստիճանների ախտորոշում: Բացի նրանից, որ էլեկտրահարվել է, նաև էլեկտրահարվելու ընթացքում կրակ, բոց է բռնկվել, և ամբողջությամբ այրվել է: Այսինքն՝ նա ունի համակցված տրավմաներ և էլեկտրահարություն»,- ասաց նա:

Ըստ Բաբայանի՝ 11-ամյա Նարեկը հիվանդանոց է տեղափոխվել արդեն ծայրահեղ ծանր վիճակում: Հիմա բժիշկները հույս ունեն, որ նրա մոտ կայունացում կգրանցվի, և կկարողանան որևէ միջամտություն անել. «Սպասում ենք լուսավոր կետի, չնայած բրոնխիալ ծառը ամբողջությամբ այրված է»:

Նույն օրը Նարեկի հետ հիվանդանոց է տեղափոխվել նաև նրա հասակակից Հրանտ Խ.-ն, ում կյանքի համար բժիշկները պայքարել են հինգ օր, սակայն հունիսի 22-ին տղայի կյանքը փրկել չի հաջողվել:

«Նրա մոտ առկա էր 90 տոկոս մակերեսային և 10 տոկոս շնչուղիների այրվածք: Գիտեք, երբ մարդու մոտ առկա է էլեկտրական այրվածք՝ բոցով՝ առաջին, երկրորդ, երրորդ, չորրորդ աստիճանի այրվածքներ, դա արդեն կյանքի հետ անհամատեղելի է, բայց մենք պայքարեցինք նրա կյանքի համար: Բազմաթիվ վիրահատություններ ենք արել, ֆունկցիոնար ենք արել, նրա օրգանիզմում կուտակված հեղուկներ կար, հեռացրել ենք»,- ասաց այրվածքաբանության ազգային կենտրոնի փոխտնօրենը:

Ըստ ոստիկանների՝ 11-ամյա երեխաները հիվանդանոց են տեղափոխվել իրենց փողոցի հոսանքի բաժանման կետում հոսանքահարվելու հետևանքով։ Փաստի առթիվ ոստիկանության Մաշտոցի բաժնի հետաքննական բաժանմունքում նյութեր են նախապատրաստվում։