Երևանում լրագրողը Hyundai-ով վրաերթի է ենթարկել 7-ամյա աղջկա
Երեկ՝ մայիսի 30-ին, վրաերթ է տեղի ունեցել Երևանում: Ժամը 13:15-ի սահմաններոմ Երևանի բնակիչ, 34-ամյա Կառլեն Ասլանյանը իր վարած Hyundai մակնիշի ավտոմեքենայով Պարոնյան–Լեո փողոցների խաչմերուկում վրաերթի է ենթարկել հետիոտն, 7-ամյա Անի Լ.-ին: Ինչպես հայտնում է ֆոտոլրագրող Գագիկ Շամշյանը, վարորդը փախուստի չի դիմել, ահազանգել է 1-03 շտապօգնություն, օգնել է երեխային տեղափոխել «Նաիրի» բժշկական կենտրոն: Դեպքի վայր են ժամանել Երևանի ճանապարհային ոստիկանության ծառայողները: Վրաերթի մասին Երևանի ՃՈ օպերատիվ կառավարման կենտրոնի պատասխանատու հերթապահ Գարիկ Հակոբյանը տեղեկությունը փոխանցել է ճանապարհային ոստիկանության ճանապարհատրանսպորտային պատահարների գործերով հետաքննական և վարչական վարույթի իրականացման բաժանմունք, որտեղից ժամանել է հերթապահ խումբը՝ բաժանմունքի պետ Գրիգոր Ավետիսյանի, ավագ հետաքննիչ Վարդան Բաղդասարյանի գլխավորությամբ: Փաստի առթիվ Վ․ Բաղդասարյանի կողմից նյութեր են նախապատրաստվում: Վարորդը ենթարկվել է սթափության փորձաքննության, պարզվել է՝ նա եղել է սթափ: Գ. Շամշյանի տեղեկություններով՝ վարորդ Կ. Ասլանյանը «Ազատություն» ռադիոկայան լրագրողներից է, իսկ վրաերթի ենթարկված երեխան սովորում է Երևանի դպրոցներից մեկի 1-ին դասարանում: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
