«5 մլն եվրո էր եկել թունաքիմիկատների գերեզմանոցը ոչնչացնելու համար, բայց 2 տարի է լսում եմ, որ այնտեղ փորձարկումներ են անում». ԲՀԿ անդամ

Օրերս այցելել եմ Էրեբունի վարչական շրջանի 4-րդ զանգվածի թունաքիմիկատների գերեզմանոց, նույն զգացողությունն ունեցա, ինչ ունեցել եմ երկու տարի առաջ: Իմ ու իմ ընկերոջ ամբողջ մարմնով մեկ քոր էր բռնել և մեր գիտակցությունը շատ վատ էր: Այս մասին, այսօր՝ ապրիլի 20-ին Երևանի ավագանու նիստում հայտարարեց ԲՀԿ խմբակցության անդամ Արմեն Ներսիսյանը:

«Ես երկու տարի խոսում եմ թունաքիմիկատների գերեզմանոցի մասին: Ուսումնասիրեք, թե այդ ԴԴՏ թունաքիմիկատը ինչքան վտանգավոր է, այն ուռուցքածին է, մեռելածին է։ Այդ թունաքիմիկատից շատ հիանդություններ են առաջանում ու մարդիկ մահանում են: 5 մլն եվրո փող էր եկել այդ թունաքիմիկատների գերեզմանոցը տեղափոխելու կամ ոչնչացնելու համար, բայց երկու տարի է լսում եմ, որ մոտ 400 հազար եվրո կամաց-կամաց ծախսվել է եւ ընդհանուր առմամբ, այնտեղ փորձարկումներ են անում: Եվս 5 տարի հետո այդ 5 մլն եվրոյից ոչինչ չի մնա, իսկ թունաքիմիկատը կշարունակի թունավորել Երեւան քաղաքը, մեր գետերը, և ընդհանուր առմամբ մեր Հայաստանը»,-ասաց նա:

Նա կոչ արեց ուսումնասիրել այդ ոլորտը, հարցի շուրջ հայտնելով իր մտահոգությունները։ 

Ի պատասխան քաղաքապետ Հայկ Մարությանն ասաց. «Ցավոք այս թեմաները երկար տարիներ անտեսված էին, ԵՄ ծրագիրը առնչվում է կենցաղային վտանգավոր թափոններին, իսկ ձեր նշածը ոչ կենցաղային թափոնների մասին է: Ձեր նշած թափոններով պետք է այլ գերատեսչություն զբաղվի, դա մեր ոլորտը չի, մեր անելիքը չի»: