Բաքվում գերության մեջ պահվող հայերի հարցը ընդգրկվել է Եվրոպայի Խորհրդի Խորհրդարանական վեհաժողովի օրակարգում

Եվրոպայի Խորհրդի Խորհրդարանական վեհաժողովի օրակարգում է ընդգրկվել Բաքվում գերության մեջ բռնությամբ պահվող հայ ռազմագերիների և այլ անձանց հարցը: Ոմանք շտապեցին լուրեր տարածել այն մասին, որ երկրները, որոնք դեմ են քվեարկել հայ պատանդների խնդրի քննարկմանը, Ռուսաստանը, Թուրքիան և Ադրբեջանն է: Ավելորդ է ասել, թե ինչ սխալ եզրակացությունների կարող է հանգեցնել նման տեղեկատվությունը: Ճշմարտությունն այն է, որ օրակարգում քվեարկությունը փաթեթավորված էր: Ռուսաստանի պատվիրակությունը դեմ քվեարկեց, քանի որ Ալեքսեյ Նավալնիի հարցը դրվեց քննարկման: Թուրք պատվիրակները դեմ քվեարկեցին, քանի որ օրակարգում ներառված էր Թուրքիայում ժողովրդավարական հաստատությունների գործունեության հարցը: Ըստ այդմ, միայն Ադրբեջանը և, հնարավոր է, Թուրքիան դեմ են քվեարկել հայ գերիների հարցը դիտարկելուն: Մենք սպասում ենք նորությունների հիմնահարցը հիմնավոր կերպով դիտարկելու վերաբերյալ և թույլ չենք տալիս սխալ մեկնաբանել իրադարձությունները և փաստերը: Այս մասին հայտնում է Նիկոլայ Պետրոսյանը: 

Հիշեցնենք՝ ԱԺ պատգամավոր Արման Բաբաջանյանը ֆեյսբուքյան էջում գրել էր․

«Ուշագրավ է, որ հայ գերիների ու տեղահանված անձանց հարցը ԵԽԽՎ լիագումար նիստի օրակարգում ներառելուն, ի շարս թուրքերի և ադրբեջանցիների, դեմ են քվեարկել նաև ԵԽԽՎ-ում Հայաստանի ռազմավարական դաշնակից Ռուսաստանի ԵԽԽՎ պատվիրակության մի քանի անդամներ:

Դեմ է քվեարկել նաև մի քանի սերբ:

Ռուսական պատվիրակության մնացյալ անդամները ձեռնպահ են քվեարկել:

Եվ սա այն դեպքում, երբ նոյեմբերի 9-ի եռակողմ հայտարարության կետերի, այդ թվում 8-րդ կետի՝ գերիների վերադարձի իրագործումը հենց Ռուսաստանի միջազգային հեղինակության հարցն է:

P.S.

Հետևությունները թողնում եմ նրանց, ովքեր Հայաստանի անվտանգությունը վերապահել են Ռուսաստանին»: