ԱԺ-ում իմքայլականներին քննադատած և աշխատանքից ազատված ԱԻ փոխնախարարը Մուրադովի ամենամոտ մարդկանցից է. ArmDaily

Այսօր ԱԺ-ում իմքայլականներին քննադատած ԱԻ փոխնախարար Բորիս Ավագյանն ԱՀ նախագահ Արայիկ Հարությունյանի հրամանով ազատվել է աշխատանքից:

Հիշեցնենք, որ այսօր ԱԺ-ում Արցախի Արտակարգ իրավիճակների փոխնախարարը հայտնել էր, որ «Իմ քայլի» պատգամավորները շահարկում են գերիների խնդիրը, դրսևորում են անթույլատրելի վարք:

ArmDaily.am-ին հայտնի է դարձել, որ Բորիս Ավագյանը Արցախում Ռուսաստանի Դաշնության խաղաղապահ զորակազմի հրամանատար, գեներալ-լեյտենանտ Ռուստամ Մուրադովի ամենամոտ մարդկանցից մեկն է: Նրանց հաճախակի կարելի է տեսնել միմյանց հետ, բացի այդ շատերը հենց նրա միջոցով են կապ պահում Մուրադովի հետ: Եվ հիմա զարմանալի է, որ Արցախում Մուրադովից շատ բան է կախված, իսկ նրա հետ հաստատապես անձնական շփում քչերը ոնեն․ ինչպես են իշխանությունները հեռացնում Ավագյանին: 

Նշենք նաև, որ Բորիս Ավագյանին աշխատանքից ազատելուց հետո ԱԱԾ են կանչել: Իսկ մինչ այդ նա հանդիպել է պատգամավորների մի խմբի հետ, ովքեր ցանկացել են խորհուրդներ հարցնել իրենց գործունեության վերաբերյալ:

Հիշեցնենք, որ այսօր ԱՀ ԱԻՊԾ–ը պաշտոնական հաղորդագրություն է տարածել Ավագյանի պաշտոնանկության վերաբերյալ, որում ասվում է. «Երևան քաղաքում Բորիս Ավագյանի կողմից տրված ասուլիսի ընթացքում հնչեցրած կարծիքների համար ԱՀ ՆԳ նախարար Կարեն Սարգսյանի հրամանով վերջինս այսօր ազատվել է ԱԻ պետական ծառայության տնօրենի տեղակալի պաշտոնից։

Ավագյանն իր կողմից կազմակերպված ասուլիսի և ծառայության անունից հանդես գալու մասին տեղյակ չի պահել վերադաս ղեկավարությանը և խոսել է իր լիազորությունների շրջանակներից դուրս թեմաներից։

Ավագյանի արտահայտած մտքերի ու կարծիքների մեծ մասը ոչ միայն չեն կիսում ներքին գործերի նախարարության և արտակարգ իրավիճակների պետական ծառայության դիրքորոշումը, այլ նաև չեն համապատասխանում իրականությանը։

Հաշվի առնելով վերջինիս՝ ծառայողին ոչ հարիր պահվածքը և պաշտոնական դիրքի չարաշահումը, Կարեն Սարգսյանի հրամանով Բորիս Ավագյանն ազատվել է զբաղեցրած պաշտոնից»։