Արցախից 9000 ընտանիք այս պահին չունի մշտական բնակության վայր. նախարար
Նոր բնակելի տներ են կառուցվում Արցախի այն գյուղական համայնքներում, որոնք ունեն հնարավոր ենթակառուցվածքներ և կարող են ավելի շատ բնակիչների սպասարկել, քան ներկայումս են բնակվում։ Խորհրդարանում լրագրողների հետ զրույցի ժամանակ այս մասին ասաց ՀՀ աշխատանքի և սոցիալական հարցերի նախարար Մեսրոպ Առաքելյանը։
Նախարարը նշեց, որ բնակելի տների կառուցման համար ֆինանսեր են ուղղվելու և՛ «Հայաստան» համահայկական հիմնադրամից, ինչպես նաև պետբյուջեից. «Այս պահին ընդհանուր բյուջեն նախանշվել է 110 մլրդ դրամ, որից 52 միլիարդը տրամադրվելու է բյուջեից»,-ասաց Մեսրոպ Առաքելյանը։
Հարցին՝ այս պահի դրությամբ հաշվառված քա՞նի ընտանիք կա, որոնց պետք է բնակարան տրամադրվի, նախարարն ասաց, որ խոսքը մոտ 9000 ընտանիքի մասին է. «9000 ընտանիք այս պահին չունի մշտական բնակության վայր։ Ընդամենը մի քանի հարյուր կացարան է կառուցվել, առաջիկա ծրագիրը նախատեսված է երեք տարվա համար»,-ասաց նախարարը։
