Ֆրանսիայում քաղաքական գործիչ, միլիոնատեր Բեռնար Տապիին ծեծի են ենթարկել և կողոպտել
Ֆրանսիացի գործարար, քաղաքական և հասարակական գործիչ Բեռնար Տապին և նրա կինը ծեծի են ենթարկվել և կողոպտվել շաբաթ երեկոյան Ֆրանսիայի իրենց տանը: Այս մասին տեղեկացնում է «Ֆրանս Պրեսը»:
Դեպքը տեղի է ունեցել Կոմբ-լա-Վիլ կոմունայում Տապիի տանը։ Մինչ զույգը քնած էր, անհայտ անձինք գողություն կատարելու դիտավորությամբ մտել են տուն: Հանցագործները ծեծել, կապել են գործարարին և նրա կնոջը ու գողացել են թանկարժեք իրերը: Ենթադրաբար, հարձակվողները 4-ն են եղել:
Հարևանները զանգահարել են փրկարարական ծառայություններ, որոնք օգնություն են ցուցաբերել տուժածներին: Տապիի կինը, որը ստացել էր թեթև վնասվածքներ, հոսպիտալացվել է, ինքը՝ Տապին հրաժարվել է հոսպիտալացումից:
Պատճառված նյութական վնասի չափի մասին դեռ չի հաղորդվում:
Վերսալի դատական ոստիկանությունը հետաքննություն է սկսել:
