Վրաստանում համընդհանուր պատվաստման գործընթացը կմեկնարկի հուլիսից. հայտնի է, թե որ պատվաստանյութից են օգտվելու

Վրաստանի Հիվանդությունների վերահսկման և հանրային առողջապահության ազգային կենտրոնի տնօրեն Ամիրան Գամկրելիձեն անդրադարձել է երկրում համընդհանուր պատվաստման հարցին՝ նշելով, որ դա տեղի կունենա, հավանաբար, հուլիսին: Այս մասին հայտնում է aliq.ge-ն:

Գամկրելիձեի խոսքով, մինչ այդ կշարունակվի պատվաստման հետ կապված ակտիվ քարոզարշավը: Սրա հետ մեկտեղ, ընթանում են բանակցություններ տարբեր արտադրողների հետ, ու մինչև տարեվերջ Վրաստանում հասանելի կլինի մի քանի տեսակի պատվաստանյութ:

«Նախօրեին սկսել ենք աշխատել «Նովաքս» պատվաստանյութ ներկրելու պայմանագրի մշակման վրա: Սա ամերիկյան պատվաստանյութ է ու արտադրման ձևը նման չէ Astrazeneca, Pfizer, Moderna պատվաստանյութերի արտադրման ձևին։ Սրա հետ մեկտեղ, բացի «Կովաքս» հարթակից բանակցություններ ենք վարում հնդկական «Սերում» ինստիտուտի հետ, հիմա քննարկում ենք մոտ միլիոն չափաբաժին «Նովաքս» ձեռք բերելու հարցը: Նաև, ծրագրում ենք հետագայում Pfizer ձեռք բերել ոչ թե «Կովաքս» հարթակի միջոցով, այլ միանգամից արտադրողից»,- նշել է Գամկղրելիձեն:

Հիշեցնենք, որ Վրաստանում պատվաստման գործընթացը մեկնարկել է մարտի կեսից: Այս փուլում պատվաստվում են բուժաշխատողներն ու 65-ից բարձր տարիքի անձինք: