«Իսկանդերի» վարկանիշը գցե՞լ, թե՞ Ռուսաստանին շանտաժ անել. ինչ նպատակ ունի Ալիեւի հայտարարությունը. Կարեն Հովհաննիսյան. ArmDaily

Իրականում Շուշիում ու ընդհանրապես Արցախի Հանրապետությունում չպետք է կիրառվեր «Իսկանդեր», որովհետև, Արցախի Հանրապետության ԶՈՒ-ն կամ պաշտպանական բանակը «Իսկանդեր» իր զինանոցում չունի, միայն ՀՀ-ն ունի իր զինանոցում «Իսկանդեր» և, ըստ էության, եթե Արցախում կիրառվում է «Իսկանդեր», ապա դա մեծ խնդիրներ է առաջացնում Ռուսաստանի համար, քանի որ բոլորս էլ գիտենք, որ «Իսկանդեր» ունի թերևս միայն Ռուսաստանը և Հայաստանը՝ պայմանով, որ Հայաստանը պետք է այն կիրառի միայն իր համար՝ իր տարածքում։ Այս մասին ArmDaily.am -ի հետ զրույցում ասել է ռազմական փորձագետ Կարեն Հովհաննիսյանը՝ անդրադառնալով Իլհամ Ալիևի հայտարարությունը, թե Շուշիում «Իսկանդեր» է կիրառվել։

«Հայաստանում լուրերի տարածում, թե «Իսկանդեր» է կիրառվել՝ արվում էր միամտաբար, կամ անգրագիտությունից ելնելով, կամ գուցե՝ միտումնավոր։ Այստեղ խնդիրը ոչ թե «Իսկանդերի» կիրառել - չկիրառելն է, այլ փաստը, որ «Իսկանդեր» է կիրառվել։ Մյուս կողմից էլ ռուսական կողմը «Իսկանդերի» կիրառման փաստը հերքել էր։ Այնտեղից նշեցին, որ 44 -օրյա պատերազմի ընթացում «Իսկանդեր» ընդհանրապես չի կիրառվել և, կարծես, թե հարցը փակվեց, բայց հիմա արդեն Ադրբեջանը, որ դեկտեմբերից Շուշիում իրականացնում էր սակրավորական աշխատանքներ՝ չգիտես ինչու միայն մարտի 15-ին նոր հայտնաբերում է «Իսկանդերի» հրթիռ և նոր միայն հայտարարում է դրա մասին։ Դա խոսում է նրան մասին, որ փորձ է արվում Ադրբեջանի դեմքով՝ Թուրքիայի միջամտությամբ անգամ ավելի հեռու գնալ՝ ՆԱՏՕ-ի միջնորդությամբ Ռուսաստանին շանտաժի ենթարկել»։

Նրա դիտարկմամբ՝ այդ շանտաժից ակնկալիքը թերևս այն է, որ Ռուսաստանը Հայաստանի հետ ռազմական համագործակցությունը հասցնի մինիմալի։ «Սա ոչ թե Ադրբեջանն է ակնկալում, այլ Թուրքիան և ՆԱՏՕ-ն, որ տարածաշրջանում Ռուսաստանը մինիմալի հասցնի իր դերակատարումը, որովհետև եթե հաստատվի «Իսկանդերի» կիրառումը՝ սա սկանդալային է, և կարող է լուրջ հետևանքներ ունենալ։ Ամեն դեպքում՝ կարծում եմ, որ սրա նպատակը նաև «Իսկանդերի» վարկանիշը գցելու մեխանիզմ է, որովհետև, եթե «Իսկանդեր» է կիրառվել և դրա կիրառումը արդյունք չի տվել, ապա ըստ էության՝ նշանակում է, որ այդ զենքի մասին լուրերը փուչիկ են, օդ են։ Միաժամանակ, եթե «Իսկանդեր» է կիրառվել Ռուսաստանի գիտությամբ, ապա ստացվում է, որ Ռուսաստանը խաղաղապահ գործունեություն ծավալելու համար մանդատ չի կարող ունենալ։ Նունիսկ կարող են հասնել նրան, որ խոսեն խաղաղապահ ուժերի դուրս բերման մասին»։