Վահան Քերոբյանի նշած ընկերությունը, որը Հայաստանում ուղիղ հեռարձակման ստուդիա է բացում «օնլայն կազինո» է. Armdaily.am

ՀՀ էկոնոմիկայի նախարարա Վահան Քերոբյանը ֆեյսբուքյան իր էջում հայտնել էր, որ շվեդական Evolution-ը Երևանում կբացի ուղիղ հեռարձակման ստուդիա, գրում է armdaily.am-ը:  

Քերոբյանը խոսել էր ընկերության 25 մլրդ դոլար կապիտալիզացիայի մասին, նշելով որ նման խոշոր ընկերություններն Հայաստանում կստանձնեն համաշխարհային որակի աշխատանքի կուլտուրայի և բարձրակարգ մասնագետների կադրերի դարբնոցի դերը, ուստի և օդուջրի պես անհրաժեշտ են մեր տնտեսությանը։

Սակայն Քերոբյանի գրառումից հասկանալի չէր դառնում, թե ինչ ստուդիայի մասին է խոսքը, ինչ ընկերություն է Evolution-ը և ինչով է զբաղվում։ 

Ընկերությունը հիմնադրվել է 2006-ին, իսկ 2015 թվականից Nasdaq Nordic-ի ցուցակում է: Evolution-ը մշակում, արտադրում, վաճառում և լիցենզավորում է լայվ-խաղատան և խաղային ավտոմատների լիովին ինտեգրված B2B լուծումներ խաղային օպերատորների համար: 

Evolution-ում աշխատում են ավելի քան 80 ազգությունների ավելի քան 10,000 աշխատողներ (EVOlutioneers) ավելի քան 20 քաղաքներում: Ընկերությունը խոստանում է հարյուրավոր աշխատատեղեր ստեղծել Երևանի և նրա հարակից տարածքների երիտասարդների համար: 

Ստուդիան գտնվելու է Երևանի կենտրոնից հարավ: Ենթադրվում է, որ շինարարական աշխատանքները կսկսվեն հաջորդ ամիս, իսկ թափուր աշխատատեղերը կբացվեն առաջիկա ամիսներին: 

Վրաստանում և Հայաստանում Evolution-ի գործառնությունների ղեկավարը Ջեյքոբ Քլասոնն է։