Սյունիքում իհարկե անվտանգ է, ի՞նչ է եղել Սյունիքում, ինչ-որ մեկը պատերազմից հետո ինչ-որ վնաս կրե՞լ է. իմքայլական պատգամավոր

Սյունիքում իհարկե անվտանգ է, ինչ է եղել Սյունիքում: Այս մասին լրագրողների հետ զրույցում հայտարարել է «Իմ քայլը» խմբակցության պատգամավոր Արմեն Խաչատրյանը:

Դիտարկմանը, որ ամեն օր հարցեր են բարձրացվում, տեսանյութեր են հրապարակվում, պատգամավորն ասել է. «Ի՞նչ է եղել այսքան ժամանակ Սյունիքում: Ինչ-որ մեկը Սյունիքում պատերազմից հետո ինչ-որ վնաս կրե՞լ է, ինչ-որ մեկին վնաս հասցվե՞լ է թշնամու կողմից»,-ասել է նա:

«Պատերազմի հետևանքներ կան, ահռելի մեծ վնասներ են կրել, դա միանշանակ այդպես է: Բայց ինչ-որ քաղաքացու անվտանգության հետ կապված խնդիր առաջացե՞լ է այսքան ժամանակ Սյունիքում: Իհարկե ոչ»,-հավելել է նա:

Պատգամավորը միևնույն ժամանակ խոսել է ԱԱԾ-ի զգուշացումների մասին՝ հայտարարելով, որ ծառայությունը ճիշտ է անում. «Ինձ անձամբ կանգնեցրել են ու ասել, որ ցանկացած օգնության անհրաժեշտության դեպքում զանգեմ հրապարակված համարով:

Դա նշանակում է, որ այդ համարով զանգահարելու դեպքում կժամանեն, կօգնեն, նույնիսկ մեքենայի անսարքությունը կվերացնեն:

Սա է, ոչ թե ասում են, որ առևանգվելիս պետք է զանգել: Եթե առևանգեն, ո՞նց է զանգելու: Որևէ մեկը չի կարող առևանգել, լուրջ քաղաքական ու ռազմական խնդիրներ կառաջանան, եթե ՀՀ քաղաքացի տուժի ինչ-որ մի բանից»: