Համացանցում երեկ տեղեկություններ տարածվեցին, որ Դանիել Իոաննիսյանը մի խումբ տղամարդկանց հետ Օրբելի փողոցի վրա գտնվող ՊՈԱԿ-ի գրասենյակում հարձակվել է նույն ՊՈԱԿ-ում աշխատող Ռաֆայել Աֆրիկյանի վրա։ Իոաննիսյանը ֆեյսբուքի իր անձնական էջում հերքել էր այդ տեղեկատվությունը։ «Քանի որ շատ է տարածվում, ևս մեկ անգամ ասեմ, ես ոչ մեկի վրա չեմ հարձակվել, ոչ մեկին մատով չեմ կպել և ոչ մեկն ինձ մատով չի կպել»,-երեկ իր անձնական էջում գրել է Իոաննիսյանը։ 

ArmDaily.am-ին Ոստիկանության տեղեկատվության և հասարակայնության հետ կապերի բաժնից տեղեկացրին, որ մամուլում եղած հրապարակումների հիման վրա նախաքննություն է ընթանում։

«Իրազեկ քաղաքացիների միավորում» հ/կ համակարգողը մեզ հետ զրույցում ասաց, որ նորմալ է համարում մամուլում հրապարակված տեղեկությունների հիման վրա քրեական գործ հարուցելը։ Ինչ վերաբերում է ՊՈԱԿ-ում ծեծկռտուքի մասին տարածված տեղեկություններին՝ Իոաննիսյանն ասաց. «Տանկով եմ գնացել, տանկով, ազգային գումարտակով եմ գնացել ՊՈԱԿ։ Իրականում ես ոչ մեկի վրա չեմ հարձակվել, ես ոչ մեկին ծեծի չեմ ենթարկել, ոչ մեկն ինձ չի ծեծել, մատով նույնիսկ հա, այսպես ավելի հստակ կլինի՝ ես ոչ մեկի մատով չեմ կպել, ոչ մեկ ինձ մատով չի կպել»,-ասել է նա։

Հետաքրքրվել են՝ միգուցե բարձր տոնյանությամբ վեճ է եղել, նա ասաց, որ տարբեր մարդկանց տարբեր բան կարող է թվալ, տարբեր մարդկանց հետ տարբեր առիթներով տարբեր խոսակցություններ է ունենում, բայց կրկնեց, որ ինքը՝Դանիել Իոաննիսյանը որևիցե ծեծի կամ որևիցե բռնության չի մասնակցել որևիցե կողմում։ Հարցին՝ արդյո՞ք երեկ ՊՈԱԿ-ում եղել է. «Տեսեք, տարբեր առիթներով տարբեր տեղեր լինում եմ ՝ հիմա դա ի՞նչ էական ա։ Տանկով, տանկով ենք գնացել ՊՈԱԿ»։

Լրատվամիջոցի հետ զրույցում ՊՈԱԿ-ի աշխատակից Ռաֆայել Աֆրիկյանը հաստատել է, որ իր և Դանիել Իոաննիսյանի միջև միջադեպ է եղել։ «Հաստատում եմ, որ եղել է միջադեպ, ավելի մանրամասն կխոսեմ ավելի ուշ»,-ասաց Աֆրիկյանը։