ՏԵՍԱՆՅՈՒԹ. Ռուս դիվանագետը Հյուսիսային Կորեայից հեռանում է ձեռքի երկաթուղային սայլակների մեջ

Ռուս դիվանագետը եւ նրա ընտանիքը հեռանում են Հյուսիսային Կորեայից ձեռքի երկաթուղային սայլակների մեջ: Պատճառը ` Covid-19-ի սահմանափակումներն են: Այս շաբաթ Փհենյանում Ռուսաստանի դեսպանատան 8 աշխատակիցներ եւ նրանց ընտանիքներն ավելի քան 34 ժամ են ծախսել, փորձելով հեռանալ Հյուսիսային Կորեայից: Հյուծող ուղեւորությունը ավարտվել է նրանով, որ առնվազն մեկ դիվանագետ իր ուղեբեռը եւ փոքր երեխաներին տեղավորել է երկաթուղային սայլակի մեջ: Նշենք, որ Հյուսիսային Կորեայի սահմանները մի քանի ամսվա ընթացքում արգելափակվել են Covid-19-ի զսպման նպատակով: Հյուսիսկորեական պետական Air Koryo ավիաընկերությունը չվերթներ էր իրականացնում Ռուսաստանի Արեւելքում ` Վլադիվոստոկից, սակայն այդ թռիչքները եւս դադարեցվել են մի քանի ամսով: 

 

Սա միակ ճանապարհն էր, որով ռուս դիվանագետները եւ նրանց ընտանիքները կարող էին լքել երկիրը, Facebook-ի իր էջում հայտնել է Ռուսաստանի դեսպանատունը: Նշվում է, որ ճանապարհորդությունը սկսվել է գնացքով։ Ռուսաստանցիները 32 ժամ անցկացրել են վատ սպասարկվող եւ դանդաղ գնացքում։ Այնուհետեւ նրանք երկու ժամ ավտոբուսով ուղեւորվել են դեպի սահման, որտեղ իրենց ուղեբեռներով նստել են երկաթուղային սայլակ և առաջ շարժվելով՝ հրելով այն ամբողջ ճանապարհի ընթացքում:

 

Ռուսաստանի դեսպանատունը հրապարակել է երրորդ քարտուղար Վլադիսլավ Սորոկինի 2 լուսանկարներ, որտեղ երևում է, թե նա ինչպես է հրում սայլակը, որի մեջ գտնվում էին նրա ընտանիքի անդամներն ու իրերը: 

 

 Սորոկինը ստիպված է եղել ձեռքի սայլակը հրել մեկ կիլոմետր, որի մի մասը ներառել է Տյումեն գետի կամուրջը, որը բաժանում է Ռուսաստանը Հյուսիսային Կորեայից: Երբ ընտանիքը հասել է Խասան ռուսական կայարան, նրանց դիմավորել են արտաքին գործերի նախարարության գործընկերները, որոնք օգնել են նրանց հասնել Վլադիվոստոկի օդանավակայան։

Քաղաքականություն

Պատահարներ