Ոստիկանությունն էլ մի օր կպահանջի Փաշինյանի հրաժարականը.Կապանի համայնքապետ

Սյունիքի մարզի Կապանի համայնքապետ Գևորգ Փարսյանը ևս կողմ է Գլխավոր Շտաբի կողմից Նիկոլ Փաշինյանի հրաժարականի պահանջին։

«Քաղաքացիական բախումներ հրահրելու փորձի հնարավորությունը կախված է հռետորաբանությունից։ Ինչ վերաբերում է Օնիկ Գասպարյանին Գլխավոր Շտաբի պետի պաշտոնից ազատելու վերաբերյալ, կարծում եմ, մեծագույն սխալ է գործում և սխալվել է, որովհետև ես անձամբ ճանաչումն եմ Օնիկ Գասպարյանին իհարկե պատերազմական ժամանակահատվածից կոնկրետ Կապանի սահմանների պաշտպանությունից։ Ես նրա մասին բարձր կարծիք ունեմ՝ հայրենասեր, անձնուրաց ու պարկեշտ անձնավորություն է»,-ArmDaily.am-ի հետ զրույցում ասել  է Փարսյանը։

Կապանի համայնքապետը կարծում է, որ Նիկոլ Փաշինյանը, վերջիվերջո, պետք է հասկանա, որ հրաժարական պետք է տա. «Նա հասցրեց նրան, որ նույնիսկ Գլխավոր Շտաբն է պահանջում նրա հրաժարականը։ Նա անընդհատ խորացնում է այս ճգնաժամը, վարչապետի աթոռից կառչած մնալով նա խորացնում է այս ճգնաժամը։ Եվ այո, գալու է այն պահը, որ ոստիկանությունն էլ է մի օր պահանջելու իր հրաժարականը»։

Ինչ վերաբերում է մարդկանց հրապարակ կանչելու Փաշինյանի քայլին, Կապանի համայնքապետը կարծում է, որ վարչապետը վերջին ճիգերն է գործադրում իշխանությունը պահելու համար։ Նա նաեւ հավելեց, որ Սյունիքում մարդիկ ի սկզբանե ոտքի էին կանգնել ու պահանջել Նիկոլ Փաշինյանի հրաժարականը, այնպես որ այս պահին դեռևս որևէ փոփոխություն այդ մասով չկա։