Facebook ընկերությունն ԱՄՆ իրավապահ մարմիններին աջակցել է Կոնգրեսի շենքում անկարգությունների մասնակիցներին ճանաչելու հարցում: Այս մասին հայտնել է ընկերության գլոբալ քաղաքականության հարցերով բաժնի ղեկավար Մոնիկա Բիքերթը, փոխանցում է Bloomberg գործակալությունը։

Բիքերթը հայտնել է, որ Facebook-ը բավարարել է տեղեկատվություն տրամադրելու մասին ԱՄՆ իշխանությունների հարցումները և ընկերության աշխատակիցները վերլուծել են անկարգությունների մասնակիցների լուսանկարները:

Միևնույն ժամանակ, նա նշել է՝ ընկերությունում այդ նպատակով դեմքի ճանաչողական համակարգ չի կիրառվել:

Բիքերթի խոսքով` ընկերությունը նաև հեռացրել է նոր անկարգություններ կազմակերպելու մասին հաղորդագրությունները։

Հունվարի 6-ին Թրամփի կողմնակիցները, չընդունելով նոյեմբերի 3-ին կայացած նախագահական ընտրությունների արդյունքները, ըստ որոնց՝ հաղթանակ է տարել դեմոկրատ Ջո Բայդենը, ներխուժել էին ԱՄՆ Կոնգրեսի շենք՝ փորձելով թույլ չտալ արդյունքների վերջնական հաստատումը Սենատի կողմից: Անկարգությունների հետևանքով 5 մարդ է սպանվել: