Ռուսական ՀՕՊ համակարգերը հետ են մղել Սիրիայի Հմեյմիմ ավիաբազայի վրա հարձակումը

Ռուսական Հակաօդային պաշտպանության համակարգերը հաջողությամբ հետ են մղել Սիրիայի Հմեյմիմ ավիաբազայի վրա իրականացված հարձակումը։ Արձակված արկերից ոչ մեկը չի հասել ավիաբազայի տարածք։ Այս մասին հաղորդում է Звезда հեռուստաընկերությունը։

Հարվածները հասցվել են Իդլիբի դեէսկալացման գոտուց, որը գտնվում է զինյալների վերահսկողության տակ։ Հենց այնտեղ գտնվող Սերակիբ քաղաք շուտով կուղարկվի ռուս-թուրքական հերթական պարեկային ծառայությունը։

Ինչպես ավելի վաղ հայտնել էինք Ռուսաստանի և Թուրքիայի զինված ուժերի անձնակազմերը համատեղ մարզումներ են անցկացրել Իդլիբում, որոնց ընթացքում մշակել են զինյալների հարձակումը հետ մղելու, վիրավորներին տարհանելու կարգը։

Իդլիբը Սիրիայում միակ վայրն է, որտեղ մինչև օրս պարբերաբար խախտվում է հրադադարի ռեժիմը։

2019 թվականի հոկտեմերին Ռուսաստանի և Թուրքիայի նախագահները հուշագիր էին ստորագրել Սիրիայի հյուսիս-արևելքում իրավիճակի կարգավորման հարցում համատեղ գործողություններ ձեռնարկելու մասին։