Այդ երիտասարդի պնդումներն արդեն որևէ լրջություն իրենց մեջ չեն պարունակում. Հրաչյա Հակոբյանը՝ Միքայել Մինասյանի մասին

«Այդ երիտասարդի պնդումներն արդեն որևէ լրջություն իր մեջ չեն պարունակում և որևէ հավաստի աղբյուր չկա, քանի որ այդ երիտասարդը իր տեսանյութերում շատ երկար ժամանակ խոսում է Թուրքիայի գործակալ լինելու մասին, այլ բաների մասին և վերջում մի թուղթ է ցույց տալիս, որի հավաստիությունը դեռ պետք է պարզվի»,-լրագրողների հետ զրույցում, անդրադառնալով Վատիկանում ՀՀ նախկին դեսպան Միքայել Մինասյանի հայտարարություններին, ասաց «Իմ քայլը» խմբակցության պատգամավոր Հրաչյա Հակոբյանը։

Նրա խոսքով՝ անլուրջ է այն հատվածը, որ երկար խոսվում է Թուրքիայի գործակալ լինելու մասին, ապա պետք է հրապարակվեր դրա մասին հավաստող փաստաթուղթ։

Հարցին, թե այդ մասով արդյոք իրավական գործընթաց սպասվում է, Հակոբյանը նշեց, որ տեղյակ չէ. «Եթե կան հիմքեր, ապա պետք է իրավական գործընթաց սկսվի»։

Լրագրողները հետաքրքրվեցին, թե թիմում արդյոք միակարծիք են այն հարցի շուրջ, որ Նիկոլ Փաշինյանը պետք է շարունակի բանակցությունները, պատգամավորը նշեց. «Մեր թիմի ներսում մշտապես լինում են բուռն քննարկումներ, բայց գոնե այս պահի դրությամբ թիմի ներսում կա այն կոնսեսնուսը, որ Նիկոլ Փաշինյանը և մեր այսօրվա կառավարությունը այն ղեկավարն ու կառավարությունն են, որ կարող են շարունակել բանակցությունները»։