Հայաստանի ԱԳ նախարար Զոհրաբ Մնացականյանը ԱՄՆ պետքարտուղարի եվրոպական եւ եվրասիական հարցերով տեղակալ Ֆիլիպ Ռիքերին ասել է, որ Ադրբեջանի սանձազերծած պատերազմը միտված է Արցախի բնիկ ժողովրդի բնաջնջմանը:

Հայաստանի ԱԳՆ մամուլի ծառայությունից հայտնում են, որ այսօր կայացած հանդիպմանը Զոհրաբ Մնացականյանն առանձնահատուկ ընդգծել է ադրբեջանական ագրեսիայում Թուրքիայի ուղղակի ներգրավվածության հանգամանքը, որն արտահայտվում է թե անմիջական ռազմական մասնակցությամբ, թե Մերձավոր Արեւելքից Ադրբեջան օտարերկրյա զինյալ ահաբեկիչների տեղափոխմամբ: Նախարարը նկատել է, որ դա լուրջ սպառնալիք է հանդիսանում տարածաշրջանային անվտանգության եւ խաղաղության համար։

«Երկուստեք ընդգծվել է ռազմական գործողությունների դադարեցման վերաբերյալ պայմանավորվածությունների անհապաղ կյանքի կոչման անհրաժեշտությունը: ՀՀ ԱԳ նախարարը կարեւորել է ԵԱՀԿ Մինսկի խմբի համանախագահ երկրների՝ այս հարցում ցուցաբերած միասնականությունը: Զոհրաբ Մնացականյանը վերահաստատել է Հայաստանի հանձնառությունը հոկտեմբերի 10-ի եւ 17-ի համաձայնություններին եւ վերիֆիկացիոն մեխանիզմներով պահպանվող կայուն հրադադարի հաստատմանը»,- ասված է ԱԳՆ տարածած հաղորդագրության մեջ։