Արցախում վնասազերծել են 72 զենք-զինամթերք. ԱՀ ԱԻՊԾ

Արցախի Հանրապետության արտակարգ իրավիճակների պետական ծառայության ճգնաժամային կառավարման կենտրոնը հոկտեմբերի 2-ից իր ծառայությունը շարունակում է ոչ մշտական տեղակայման վայրում՝ արտակարգ ռեժիմով:

Ինչպես նախապատերազմական, այնպես էլ այս օրերին, կենտրոնն օպերատիվորեն արձագանքում է բնակչության բոլոր կանչերին և ցուցաբերում հումանիտար աջակցություն։ Սեպտեմբերի 27-ից 911 հեռախոսահամարով ստացվել են տարբեր կանչեր՝ կենցաղային, տեխնիկական ու անվտանգության բնույթի:

Նախորդ շաբաթ ծառայության ահազանգման կենտրոնում գրանցվել է 9137 զանգ, ստացվել է ավելի քան 400 հաղորդագրություն:
Կանչերի մեծ մասը՝ 105-ը, վերաբերել են բնակչության կենսապահովմանը: Փրկարարներն ապաստարաններ են հասցնում անհրաժեշտ դեղորայք, պարենամթերք, բժշկական կենտրոններ տեղափոխում առողջական խնդիր ունեցող քաղաքացիներին, ցուցաբերում օգնություն:
Ստացվել է զենք-զինամթերքի հայտնաբերման 72 հաղորդագրություն։ Ծառայության սակրավորական խմբերը տեղափոխել ու ոչնչացրել են բնակելի շենքերի ու առանձնատների բակերից, տնամերձ հողամասերից ու այգիներից հայտնաբերված զենք-զինամթերքը։

Ադրբեջանական զինուժի կողմից Արցախի խաղաղ բնակչությանը թիրախավորելու և բնակավայրերը հրթիռակոծելու հետևանքով պատերազմի հենց առաջին օրերից հրդեհի հարյուրավոր ահազանգեր են ստացվել: Հրշեջ-փրկարարներին մեծ մասամբ հաջողվել է ժամանակին կատարել հրդեհաշիջում: Միայն անցած շաբաթ հրետակոծությունների արդյունքում հրդեհվել է 10 բնակելի տուն և ավտոտրանսպորտ: Բոլոր հրդեհներն էլ մարվել են:

Արցախի հանրապետության արտակարգ իրավիճակների պետական ծառայությունը շարունակում է թիկունքային ուժեղացված ծառայությունը: 911, 101 և 112 հեռախոսահամարները հասանելի են միշտ և ամենուր: