Այսօրվանից կարգելվի ՀՀ-ից դեպի Արցախ անձանց և տրանսպորտային միջոցների ելքը՝ որոշ բացառություններով
ՀՀ ոստիկանությունը տեղեկացնում է, որ այսօրվանից կարգելվի ՀՀ-ից դեպի Արցախ անձանց և տրանսպորտային միջոցների ելքը՝ որոշ բացառություններով:
Ոստիկանության հաղորդագրությունը ներկայացնում ենք ստորեւ.
2020 թվականի հոկտեմբերի 2-ից՝ ժամը 14:00-ից, Մ-12 միջպետական մայրուղու սահմանային հատվածում կտեղադրվեն շարժական անցակետեր:
Միաժամանակ՝ կարգելվի Հայաստանի Հանրապետությունից դեպի Արցախ անձանց և տրանսպորտային միջոցների ելքը՝ բացառությամբ Պաշտպանության բանակի և Արցախի կառավարության կարիքների համար իրականացվող փոխադրումների, ինչպես և ՀՀ կառավարության կողմից տրված թույլտվության հիման վրա առանձին դեպքերի:
Մասնավորապես՝
«Արարողակարգի մասին» ՀՀ օրենքի 10-րդ հոդվածի 1-ին կետով սահմանված բարձրաստիճան պաշտոնատար անձինք.
ՀՀ պաշտպանության նախարարության անձնակազմ և տրանսպորտային միջոցներ
ՀՀ արտակարգ իրավիճակների նախարարության անձնակազմ և տրանսպորտային միջոցներ
ՀՀ առողջապահության նախարարություն
ՀՀ Ոստիկանություն
ՀՀ ազգային անվտանգության ծառայություն
Արցախի կառավարության ներկայացուցիչներ և տրանսպորտային միջոցներ
Պետական գերատեսչությունների դեպքում՝ Վարչապետի աշխատակազմի կողմից տրված թույլտվության, ֆիզիկական և իրավաբանական անձանց դեպքում՝ ՀՀ ոստիկանության կողմից տրված թույլտվության պայմանով:
Նշենք, որ այսօր՝ ավելի վաղ հաղորդագրություն էր տարածել ՀՀ կառավարությունը՝ տեղեկացնելով, որ Հայաստանում եւ Արցախում ռազմական դրության պայմաններում անվտանգության նկատառումներից ելնելով՝ հոկտեմբերի 2-ից՝ ժամը 14:00-ից, գործելու են մի շարք
սահմանափակումներ և կարգավորումներ:
